Hatutan.com, (21 Setembru 2023), Díli-Tribunál Judisial Primeira Instánsia Díli (TJPID), Kinta (21/09/2023),  la konsege halo kontinuasaun audiénsia julgamentu bá  kazu “duun-malu” entre eis Ministra Negósiu Estranjeiru no Kooperasaun (MNEK), Adaljiza Albertina dos Reis Magno ho eis-konsul jerál Timor-Leste nian iha Sidney-Austrália, Luciano Valentim da Conceição “Timor Maubere”.

Eis Konsul Jerál Timor-Leste bá  Estadu Nova Gales do Súl, Sidney-Australia, Luciano Valentim da Conceição “Timor Maubere” ho Defensór Publiku, Sergio Quintas, hatama keixa ba TDD kontra MNEK Adaljiza Magno, Tersa (04/10/2022). Foto/Dok. Hatutan.com

Tribunál Díli tau ona ajenda kona-bá prosesu julgamentu nian hahú tuku 09:00 dadeer, maibé julgamentu la konsege la’o tuir nia ajenda tanba Ministériu Públiku  ne’ebé reprezenta hosi Prokuradór Alfeo Morreira la marka prezensa.

“Ohin, Tribunál marka tuku 09:00 dadeer, kontinuasaun julgamentu kona-bá eis Ministra Adalzija Magno, ne’ebé tinan tolu liubá, halo deklarasaun públiku, bosok, inventa ho lia falsu, duun matak ha’u, dehan ha’u troka konta bankária ofisiál Estadu, ne’e mak  osan estadu Timor-Leste manda, la to’o iha Sidney, Australia,” Luciano Valentim da Conceição “Timor Maubere”, hateten bá jornalista sira  iha Tribunál Díli.

“Julgamentu ida, Luciano Timor Maubere haktuir, públiku hatene ona, dezde tinan kotuk, no ohin, loloos, rona sasin sira. Maibé, Ministériu Públiku ne’ebé iha kontestu ida ne’e reprezenta Estadu, reprezenta eis-Ministra Adalzija Magno, la marka prezensa, nune’e, julgamentu a-dia fali bá loron 26 fulan-Outubru,” Luciano Timor Maubere informa.

Tuir Luciano Timor Maubere, katak, biar prosesu julgamentu ida ne’e bainhira to’o ona nia rohan, hetan ona ninia solusaun, iha ona finalidade mós, nia sei lori nafatin kazu hanesan, ho ema ne’ebé hanesan, nu’udár indivídu, porsesa bá iha Tribunál.

Luciano Timor Maubere afirma, fó razaun bá nia atu lori nafatin kazu ne’e bá Tribunál, la’os kestaun katak, nia iha problema ruma ho eis-MNEK Adalzija Magno ka, keta iha buat ruma. Maibé, ne’e mak justisa ida ne’ebé mak loloos nian, nune’e povu Timor-Leste tomak bele hatene.

Iha prosesu sira konsiliasaun ne’e, prezide hosi Juiza singular Edite Palmira, Ministériu Públiku (MP), reprezenta hosi Prokuradór Alfeo Morreira, no parte Autór, akompaña hosi Defnsór Públiku, Sérgio Paulo Dias Quintas.

Molok ne’e, Tersa 04 fulan-Outubru 2022, haleu tuku 09:00 dadeer Otl, Eis-Konsul Jerál Timor-Leste bá  Estadu Nova Gales do Súl, Sidney-Austrália, Luciano Valentim da Conceição “Timor Maubere”, akompaña hosi Defensór Públiku Sergio Quintas, bá hatama keixa bá Tribunál Distritál Díli (TDD) kontra Ministra Negósiu Estranjeiru no Kooperasaun (MNEK), Adazija dos Reis Magno, tanba iha tinan 2021 la transfere osan iha konta bankária Estadu nian bá TL nia konsul jerál iha Austrália.

Razaun keixa ne’e, relasiona ho akontesimentu ne’ebé ligadu no deklarasaun hosi Ministra Adaljiza dos Reis Magno, iha fulan-Marsu 2021 bainhira osan operasionalidade ne’ebé durante fulan-lima la halo transferénsia hosi Díli bá iha Sidney-Austrália.

Hatán bá keixa ne’e, Tribunál notifika duni MNEK Adalzija, atu iha Segunda (20/02/2023), tuku 14:30 lorokraik Otl, tenke prezente iha Tribunál Distritál Díli (TDD), hodi hatán bá keixa ne’ebé Eis Konsul Jerál, Luciano Timor Maubere, hatama tanba la satisfás no ofendidu ho akuzasaun sira hosi MNEK Adaljiza Magno.

Infelizmente governante ne’e la marka prezensa iha Tribunál, maibé delega de’it ninia kolega diplomata na’in-tolu seluk mak akompaña prosesu konsiliasaun bá nia kazu ne’e iha TDD, inklui Prokuradór Alfeo Morreira nu’udár reprezentante Governante ne’e nian, tanba keixa hosi Luciano Timor Maubere”, kontra Estadu.

Jornalista: Rogério Pereira Cárceres