Hatutan.com, (04 Marsu 2024), Díli—António da Conceicão “Kalohan” hala’o hikas knaar nu’udár deputadu bankada Partidu Demokrátiku (PD) iha VI Lejislatura Parlamentu Nasional (PN), Segunda (04/03/2024).

“Ha’u hetan konvite fila-fila hosi Prezidente Repúblika bá simu pose iha loron 12 Dezembru 2023 no iha pose ne’e maka ha’u husik funsaun nu’udár deputadu hodi bele halo tuir Lei katak, bainhira sai deputadu labele ezerse funsaun seluk tanba inkompatibilidade. Tanba ohin ha’u mai fila-fali retoma ha’u nia mandate,” deputadu António da Conceição hateten iha PN, Segunda (04/03/24).

Lee Mós: António da Conceição “Kalohan” Husu Fila bá PN

Deputadu ne’e klarifika katak, nia parte retoma mandatu nu’udár deputadu la’ós ho razaun tanba atu hetan imunidade hosi Parlamentu Nasionál bá desizaun Tribunál nian.

“Ligadu bá kestaun ne’ebé maka dehan katak, ha’u mai PN atu buka imunidade, ha’u ne’e deputadu titular. Kuandu ha’u deputadu titulár sei ezerse funsaun iha li’ur, ha’u nafatin iha imunidade tanba ha’u mós seidauk hala’o funsaun embaixadór ninian ne’ebé atu iha inkompatibilidade atu hanesan ho ha’u nia funsaun deputadu,” nia hateten.

Kalohan esplika, nia simu pose nu’udár embaixadór liu tiha fulan ida, nia atu sai bá nasaun Indonézia  iha 12 Janeiru 2024, no iha loron 08 Janeiru 2024 nia trata hela pasaporte iha embaixada Indonézia, iha momentu ne’ebá nia tuur hela iha embaixada nian maka anúnsiu kona-bá nia hetan kondenasaun hosi Tribunál tinan lima efetivu.

“ida-ne’e supreza ida bá ha’u,” nia espressa.

Jurista Timoroan: Tuir Loloos Labele

Jurista Timoroan, Fernando Franca da Costa.

Jurista Timoroan Fernando Franca da Costa hateten, António da Conceição  agora daudaun sei iha hela faze rekursu no seidauk iha desizaun tanba públiku hatene katak bainhira kondenadu, nafatin tenke nune’e, tenki hakruk ba Lei.

“Relativamente ho aktu António da Conceição nia, tuir loloos ita mak tenki iha konsiénsia ba ita nia an tanba nia hanesan arguidu ne’ebé mak kondenadu.  Tuir loloos seidauk bele merese atu bele ativa fila-fali iha Parlamentu Nasionál hanesan membru deputadu, ne’e labele,” Fernando Franca da Costa hateten iha TJPID (04/03/2024).

Jurista ne’e fó razaun katak, agora dadaun ne’e sei iha faze bá rekursu ninian, maibé bainhira karik desizaun seidauk tun, ne’e signifika ida-ne’e sei kondenadu nafatin, tenke hein nafatin desizaun liuliu despaixu mai iha ninia defeza ne’ebé mak rekore mai iha Tribunál Rekursu.

Nia hatutan, bainhira iha ona desizaun hosi Tribunál rekursu nian tun ona katak revoga fila-fali desizaun hosi Tribunál Primeira Instánsia, entaun prontu bele kontinua servisu.

“Normalmente ha’u koalia ona katak bainhira ita hakarak implementa justisa ida ne’ebé mak justu bá povu atu labele ko’alia beibeik injustisa, entaun ba ida ne’ebé mak hanesan ukun na’in ka lideransa ona ba nasaun ida ne’e, ita mak tenser hatudu ita nia an hodi labele hatudu ita nia parte fraku maibé hatudu ba povu no sosiedade hotu maski hala’o ona knaar nu’udár ministru ka membru parlamentu, ita mós tenki kompri Lei tanba iha konstituisaun konsagrada ona katak atu ema ki’ik ka boot hotu-hotu tenki hakruk ba Lei,” Jurista Timoroan Fernando Franca da Costa hateten.

Jurista ne’e esplika tán, bainhira laiha desizaun hosi Tribunál Rekursu ba iha defeza kona-bá rekursu ne’e, entaun nia seidauk bele halo karta hodi ativu fali nu’udár deputadu iha Parlamentu Nasionál.

“Atu subar an hosi imunidade karik ne’e atu dehan saida. Agora ema hotu-hotu hatene katak António da Conceição hanesan kondenadu. Tanba ne’e maka labele uza maneira ida hodi bele dezvia tia fali buat ne’ebé mak povu rasik hatene ona no hare ho matan,” nia esplika.

Jornalista Estajiária: Zita Menezes/Lazaro Quefi