Hatutan.com, (05 Marsu 2024), Díli-Komisaun Reguladóra Artes Marsiál (KRAM) nota  membru sira iha grupu arte Marsiál (GAM), hanesan  Persaudaraan Setia Hati Terate (PSHT), Ikatan Keluarga Sakti, Putra Timor-Leste (IKS-PTL) ho Kmanek Oan Rai Klaran (KORK), kontinua utiliza atributu ka hatais farda iha fatin públiku no halo atividade treinu iha tempu kalan.

Lee Mós: PNTL-KRAM Konklui Re-fiskalizasaun bá Sentru 993 Hosi PSHT-IKS-KORK iha Munisípiu 11

Konférensia Imprensa KRAM, Tersa (05/03/2024). Foto/Tome da Silva

Iha loron 10 fulan-Novembru 2023, IX Governu Konstitusionál liuhosi reuniaun Konsellu Ministrus hasai no aprova ona Rezolusaun Governu nian ho Númeru 45/2023, kona-bá “Suspensaun bá Atividade Treinamentu Sira”.

Ho desizaun ida-ne’e, Konsellu Ministrus atribui kompeténsia bá KRAM, durante loron 90 (10 Novembru 2023 to’o 10 Abríl 2024), hodi halo atividade refiskalizasaun bá organizasaun arte marsiál tolu, PSHT, IKS-PTL no KORK, sira-nia sentru treinamentu no estruturasaun sira priénxe ona rekézitu ka lae.

Prezidente KRAM, Octávio da Conceição, hateten, durante KRAM ninia refiskalizasaun, hatudu katak, membru organizasaun arte marsiál tolu ne’e kontinua komete irregularidade hodi la kumpre Rezolusaun Númeru 45/2023, kona-bá Suspensaun Atividade Treinamentu sira.

“KRAM deteta no simu informasaun hothotu, hosi sub-estrutura no sub-KRAM munisípiu sira, katak, organizasaun PSHT nia membru sira kontinua halo atividade treinamentu subar-subar, kontinua hatais farda la’o bá la’o mai iha bairru laran sira, kontinua halo publikasaun iha média sosial sira, provokasaun entre sira ho sira, entre sira arte marsiál seluk inklui arte rituál sira,” Prezidente KRAM, Octávio da Conceição, ho nia sekretáriu ezekutivu, hateten bá jornalista sira liuhosi konferénsia imprénsa iha kna’ar fatin, Edifísiu MJDAK, Lecidere-Díli, Tersa (05/03/2024).

Bá membru IKS-PTL sira, treinadóres sira, KRAM simu informasaun no deteta katak, sei iha nafatin terinadór sira ne’ebé fó terinu subar-subar, hosi fatin ida bá fatin ida, to’o konvida malu tama iha Otél laran, hodi hanorin malu iha Otél laran.

“Ami KRAM husu bá lideransa estrutura nasionál PSHT, IKS-PTL no KORK, atu respeita ordém estadu nian, liuhosi númeru 45/2023,” Octávio da Conceição afirma.

KRAM mós husu bá membru no lideransa sira iha GAM tolu ne’e, atu obedese mós bá regulamentu no lei hotu-hotu, liu-liu lei Númeru 05/2017, artigu 32, koalia kona-bá koolaborasaun hosi lideransa sira no treinadór sira, devér koolaborasaun. Husu mós atu sira bele kumpri rezolusaun.

Bainhira membru sira arte marsiál  la kumpri nafatin, maka tuir lei númeru 05/2017, artigu 9, hateten katak, KRAM iha kompeténsia atu hato’o paresér legál sira, paresér favorável sira bá Ministru Nélio Isaac Sarmento, atu aprezenta bá iha Konsellu Ministru, hodi foti desizaun sira tuir mai.

Tuir prazu, rezolusau númeru 45/2023 ne’e sei remata iha loron 10 fulan-Abríl 2024. Maibé, karik maka, treinadór sira, la kontrola sira nia membru sira, ne’ebé sei kontinua komete atividade ilísita sira,  KRAM sei rekomenda katak, dezobediénsia, falta de koolaborasaun, falta dixíplina, no falta dezordém bá ordém estadu nian.

“Iha tempu badak, KRAM sei notifika lideransa arte marsiál tolu ne’e, atu kontrola sira nia atividade sira, sira-nia membru sira ninia atitude sira, para nune’e, bele fó biban no fó razaun bá KRAM hodi aprezenta rekomendasaun sira, no paresér favorável bá sua-exelénsia Ministru Juventude Desportu no Arte Kultura, Nelio Isaac Sarmento hodi aprezenta bá Konsellu Ministru,” nia hateten.

Hatán kona-bá desizaun bá kontinua suspende ka lae, Octávio da Conceição dehan, ida ne’e kompeténsia Konsellu Ministru nian. Bá kestaun falta de koolaborasaun, falta de komprimentus, falta de obedese, ne’e kestaun seguransa, no kompeténsia iha komandu jerál Polísia Nasionál Timor-Leste (PNTL).

Polísia maka atu asegura ordém estadu nian, liuhosi rezolusaun Númeru 45/2023, no Despaixu Konjunta entre Ministru na’in-rua, Ministru Interior, no Ministru Juventude Desportu, Arte no Kultura nian, kona-bá servisu hamutuk hodi asegura rezolusaun Governu nian.

Jornalista: Rogério Pereira Cárceres