Hatutan.com, (06 Agostu 2022), Díli-Polísia Nasionál Timor-Leste (PNTL) Munisípiu Díli, liuhosi Eskuadra Dom Aleixo, Sábadu (06/08/2022), mobiliza membru grupu arte marsiál no grupu arte ritual sira hodi hala’o atividade limpeza konjunta iha kapitál Díli.

Lee Mós : Arte Marsiál ho Arte Rituál Bele Ona Halo Atividade Treinu

Komandante PNTL Eskuadra Dom Aleixo, Inspetór Alex da Costa “Samurai” fó orientasaun bá membru arte marsiál ho arte rituál sira iha atividade limpeza jeral konjunta, Sábadu (06/08/2022). Foto/Hatutan.com

Membru arte marsiál ho ritual sira  ne’ebé partisipa iha limpeza jerál ne’e mai hosi Persaudaraan Setia Hati Terate (PSHT), Ikatan Keluarga Silat Timor Leste (IKSPTL) Kera Sakti, Kmanek Oan Rai Klaran (KORK) ho Sete-Sete (77).

Komandante PNTL Eskuadra Dom Aleixo, Inspetór Alex da Costa “Samurai”, hateten, iha semana rua liubá kotuk, komandu eskuadra hasai konvite ba lider arte marsiál tolu; PSHT, Kera Sakti, KORK ho lider arte rituál 77 hodi partisipa iha enkontru ida, oinsá mak atu haree bá estabilidade seguransa iha área sira Dom Aleixo nian liuhosi atividade limpeza jerál.

“Ami mai realiza limpeza jerál hamutuk atu hatudu de’it amizade entre grupu arte marsiál no arte rituál sira bá komunidade. Tanba uluk taka, depois reativa fila-fali. Sé Governu reativa, oinsá sira bele re-integra fila-fali bá komunidade,” Inspetór Polísia, Alex da Costa “Samurai”, hateten.

Alex “Samurai” ne’ebé uluk mós nu’udár juventude rezisténsia ida bá luta libertasaun nasionál Timor-Leste nian ne’e  husu bá juventude arte marsiál no rituál sira  atu hatudu komportamentu di’ak iha sosiedade no komunidade nia leet, hodi nune’e bele kontribuisaun bá estabilidade nasionál no dezneovlvimentu nasionál.

“Sira nia papél iha komunidade maka tenke harii no kria estabilidade, no parte seguransa nian tenke iha responsabilidade bá iha ita nia rai laran. Ita labele husik situasaun pasadu ida ne’ebé maka dala-ruma mosu negativu, oinsá mak ita tenke hateke bá oin. Ida ne’e mak importante, no tanba ida ne’e mak ohin ita haree joven sira barak, lider arte marsiál tolu ne’e, sira hatudu duni sira-nia kontribuisaun di’ak,” Alex da Costa “Samurai” hateten tán.

Limpeza jerál konjunta membru arte marasiál no arte rituál iha Díli, Sábadu (06/08/2022). Foto/Hatutan.com

Atividade limpeza jerál konjunta hosi grupu arte marsiál no arte rituál ne’e sei kontínua nafatin iha kada fim de semana. Maibé, tuir planu, Komandu Eskuadra Dom Aleixo, sei kria tán eventu desportiva bá juventude sira ne’e, hodi hametin liután unidade, pás ba malu.

Liuhosi limpeza jerál ida ne’e, atu komemora mós loron nasionál FALINTIL  bá dala-47 (20 Agostu 1975-2022) no Konsulta Popular 30 Agostu 1999, ne’ebé iha tinan 2022 ida ne’e, sei selebra dala-23.

Rute bá atividade limpeza jerál ne’e, hahú hosi estrada públiku iha Eskuadra PNTL Dom Aleixo nia oin, Luru-Mata, Fatuhada, Kampung Alor, Bairru-Pité, Hudi-laran, Ai-mutin, no ikus liu, konsentra hikas iha Eskuadra PNTL Dom Aleixo.

Vise Koordenadór PSHT, Renato Doutel, apresia ho planu komandu PNTL nian liuhosi Komandu Eskuadra Dom Aleixo hodi organiza ona sira kontribui bá limpeza iha sidade Díli no organiza atu membru arte marsiál sira kria pás bá malu.

“Ida ne’e, primeira vez ba ami hosi arte marsiál hirak nee. Durante ne’e, ami taka hela, maibé hosi ami nia komandante eskuadra Dom Aleixo nia planu ne’e kapás, ne’ebé ami garante katak, bá oin ne’e, ami sei hamutuk kria amizade bá malu no kontribui bá kria pás iha sosiedade,”  Renato Doutel hateten.

Observasaun Hatutan.com iha terrenu nota, durante atividade limpeza konjunta ne’e, laiha insidente ruma mak mosu, lao ho amizade tebes.

Jornalista: Rogério Pereira Cárceres