Hatutan.com, (20 Marsu 2024), Díli–Empreza Alfa, Lda ne’ebé hetan kontratu ho Governu hodi importa foos subsídiu sente lakon tanba to’o agora Governu seidauk selu sira tuir kontratu servisu ne’ebé estabelese ona.

Lee Mós: Manipulasaun iha Foos Subsídiu, Empreza Importadór Husu Vise-PM Francisco Kalbuadi Lay Aprezenta Provas

Foos iha armajenamentu CLN nian iha Tibar, Liquiça, ne’ebé fa’an ona ho presu $12.00 kada saka 25kg bá povu iha terítoriu nasionál. Foto/Dok

Jerente Alfa, Lda, Paulo Sarmeto, Kuarta (20/03/2024), hateten ko’alia kona-bá subsídiu foos ne’e ko’alia kona-bá kapitál  tanba empreza utiliza kapitál rasik hodi bá sosa foos iha estranjeiru no importa mai Timor-Leste, maibé to’o agora Governu sidauk rekupera fila kapitál ne’ebé empreza investe ona tanba ne’e empreza sente lakon.

“Bainhira ema dehan hasai osan, maibe kuandu ita la dada, neneik ita sei lakon, tanba Governu tahan empreza nia  kapital no empreza atu halo planu negósiu bá oin paradu tiha tanba kapitál ne’ebé investe bá importa foos hodi fornese bá programa subsídiu foos seidauk  fó fila ka seidauk rekupera,” Paulo Sarmento hateten bá Hatutan.com iha knar fatin, Díli.

Paulo Sarmento informa  sira-nia parte hato’o ona preokupasaun bá parte relevante hanesan Ministeriu Komérsiu n o Industria ( MCI) tanba gastus ne’e la’ós uitoan.

“Kona-bá dokumentu mós submete ona, saida mak sira nia hakarak ami halo kompleta ona, mais to’o agora sidauk iha informasaun ida mai ami atu selu ami,”  nia hateten.

Kontratu ne’ebé Empreza Alfa  halo ho Governu  ho durasaun  fulan-tolu (3), hahú iha loron 16 fulan-Janeiru no remata iha 16 fulan-Marsu 2024 tenke importa foos subsídiu ho  kuantidade tonelada 7.500.

Jerente Alfa, Lda, Paulo Sarmeto. Foto/Elio dos Santos da Costa

Bainhira empreza Alfa foin distribui de’it foos subsídiu tonelada 4.500, maibé Governu haruka hapara no laiha konfirmasaun katak empreza sei kontinua ka lae, to’o deit kontratu remata iha loron 16 fulan-Marsu  2024.

“Estadu haluha tiha, koalia ho ami haruka halo kontratu, ami sosa tiha foos sira ne’e tama mai, agora iha hela armajen, agora sira halo finji lahatene tiha, foos sira ne’e ami lori ba ne’ebé hamutuk tonelada 7.500,” nia hateten.

Liga ho deklararasaun hosi Vise-Primeiru Ministru no Ministru Koordenadór asuntu Ekonomia dehan katak iha manipulasaun bá folin foos,  Paulo Sarmento, hateten ne’e imposivel ho nune’e nia husu Vise-Primeir Ministru atu hatudu evidensia ruma konaba manipulasaun folin foos.

“Lolos ne’e ami fan kada saka $12.00 maibe tanba deit sentimentu nasionalizmu no konsidera katak nasaun ne’e ita-nian entaun ami deaide hatun folin ba $11.50.

Kona-bá manipulasaun ne’e Alfa Lda konsidera laos husi distribuitor foos mak halo, ne’e falha husi governu, ne’e falla husi kontrolu, laos ami  nian.

“Ami nia dever mak distribui deit, to’o agora mosu folin foos sae iha fatin seluk maibe governu la halo kontrolu” nia dehan tan

Governu kontratu subsídiu foos ho empreza Alfa  kada saka US$5.00  bá kg 25 ho marka golden.

Jornalista : Leopoldina de Carvalho