Hatutan.com, (20 Marsu 20204), Díli—Governu liuhosi reuniaun Konsellu Ministrus (KM), Kuarta (20/03/2024), aprova ona projetu Dekretu Governu, hodi deside data bá realizasaun Asembleia Aldeia no Konsellu Suku iha ámbitu prosedimentu eleisaun lider komunitáriu sira.

Lee Mós: Xefe Suku Sira Tenke Ukun Ho Justu no Inkluzivu

Pezidente Repúblika, José Ramos-Horta partisipa iha eleisaun órgaun suku segunda volta iha Sentru Votasaun EBC 17 Abríl, Suku Metiaut, Díli, 13 Novembru 2023. Foto/Vito Salvadór

Tuir proposta ne’ebé aprezenta hosi Ministru Administrasaun Estatál (MAE),  Tomás do Rosário Cabral kona-bá kalendáriu ne’ebé KM aprova ona, prosesu konstituisaun meza eleitorál bá suku 10 ne’ebé la halo eleisaun iha 28 fulan-Outubru 2023 no kandidatu sira ba eleisaun Xefe Suku no ninia kontensiozu, sei hala’o iha loron 12 fulan-Abríl 2024. Períodu informasaun públika no edukasaun eleitór kona-bá prosesu eleisaun lideransa komunitária nian sei hala’o to’o loron 24 fulan-Abríl 2024.  Nune’e, eleisaun Xefe Suku ne’e sei hala’o iha loron 27 fulan-Abríl no apuramentu bá rezultadu tenke termina iha loron 28 fulan-Abríl 2024.

Eleisaun  bá suku 10 ho aldeia 53  no total eleitór 26.992  ne’e mak hanesan iha Munisípiu Díli, Postu Administrativu Kristu Rei  iha suku Ailoc ho nia aldeia lima, Postu Administrativu Dom Aleixo, Suku Bebonuk, Madohi ho Manleiana ho aldeia hamutuk 28 no postu Administrativu Metinaro suku Maneloão ho aldeia neen (6).

Munisípiu Aileu, Postu Administrativu Laulara iha Suku Bocolelo ho aldeia hamutuk haat (4), Postu Administrativu Aileu iha Suku Lequitura, aldeia haat (4), Munisípiu Manatuto, Postu Administrativu Laclo Suku Laicore, aldeia haat (4), Suku Uma-Caduac aldeia ida no Postu Administrativu Barique, Suku Sikone-Diloli, aldeia rua no Munisípiu Viqueque, Postu Administrativu Ossu, Suku Builo ho aldeia haat (4).

Komunikadu imprensa ne’ebé Hatutan.com asesu relata katak bainhira laiha kandidatu xefe suku ne’ebé maka hetan votu válidu liu metade ne’ebé fó-sai, sei realiza filafali votasaun daruak entre kandidatu rua ne’ebé hetan votu maioria iha loron 13 fulan-Maiu 2024.

Votasaun bá eleisaun lia-na’in no reprezentante juventude ba Konsellu Suku sei hala’o to’o loron 8 fulan-Maiu ka to’o loron 24 fulan-Maiu 2024.

Fó hanoin fila-fali katak Timor-Leste foin realiza nia eleisaun lider komunitáriu ka eleisaun suku loron 28 fulan-Otubru 2023 iha primeira ronda no eleisaun segunda ronda nian iha loron 13 fulan-Novembru 2023. Eleisaun suku ne’e bazeia bá orientasaun Lei númeru 9/2016 no Dekretu-Governu númeru 14/2016.

Aprova Rezolusaun Apoiu Rekolla Lixu

Konsellu Ministru mós aprova ona rezolusaun Governu kona-bá apoiu hodi rekolla lixu iha Díli ne’ebé aprezenta husi Ministru Planeamentu no Investimentu Estratéjiku (MPIE), Gastão Francisco de Sousa.

“Governu rekoñese nesesidade urjente atu kombate lixu, inklui lixu tasi, liuhosi asaun oioin hanesan sensibilizasaun, limpeza iha tasi no tasi ninin no inisiativa seluk hodi halo monitorizasaun, kontrolu, redusaun no mitigasaun lixu,” sita komunikadu imprensa ne’e.

Projetu Rezolusaun Governu ne’e oinsa atu promove koordenasaun entre ministériu oioin no entidade públika sira, hodi alkansa objetivu bá rezolusaun ida-ne’e, liuliu bá sira ne’ebé responsavel ba meiu ambiente no administrasaun estatál, nune’e mós determina hodi halo prosedimentu nesesáriu baáaprovasaun no finansiamentu operasaun sira ne’e to’o montante másimu millaun $1.88.

Jornalista : Leopoldina de Carvalho