Hatutan.com, (21 Marsu 2024), Díli—Prezidente Repúblika (PR), José Ramos-Horta sei fó indultu bá prizoneiru sira ne’ebé hatudu komportamentu di’ak iha prizaun no kumpri ona metade hosi pena ho lealdade.

Sekretária Estadu Igualdade no Inkluzaun (SEII) fó formasaun ba Prizioneiru sira iha Prizaun Gleno Kona-bá Kontrola Hahalok Hirus, (15/11/2021). Foto/SEII.

Assuntu ne’e hato’o hosi Primeiru Ministru (PM), Kay Rala Xanana Gusmão iha Palásiu Prezidensiál Nicolau Lobato Bairru-Pité, Kinta (21/03/2024) hafoin hasoru-malu ho Xefe Estadu Ramos-Horta.

Lee Mós: Lei Indultu Fó Kompeténsia bá Xefe Estadu Perdua Pekadór Sira Nu’udár Umanu

“Ami mós ko’alia kona-bá indultu, Prezidensia Repúblika dehan sei haree tanba iha maluk balun ne’ebé iha kadeia sala kiik liu ne’ebé tetu bá mai sei tau konsiderasaun atu bele iha indultu,” Primeiru Ministru, hateten.

Tanba ne’e, Xanana Gusmão mós fó ona instrusaun bá Ministériu Justisa (MJ), Sérgio Hornay atu haree bá dadur hotu-hotu iha Timor laran tomak hodi hatene sira iha kadeia tanba saida, tinan hira, komporta di’ak ka la’e no buat sira ne’e hotu atu bele tetu no haree katak sira merese bá indultu ne’e.

Xanana Gusmão hatutan, dadur sira ne’e balun iha prizaun tinan 10 ona, no barak ne’ebé sira nia situasaun iha dadur liu ona tinan lima maibé la hetan julgamentu tanba sira ne’e hotu maka husu bá Ministériu Justisa atu haree.

“Tanba ne’e maka Ministériu Justisa sei mai ko’alia ho Xefe Estadu atu balun ne’ebé komportamentu di’ak, iha arrependimentu no kumpre ho lealdade bá sira nia sentensa bele rekomenda bá Xefe Estadu atu fó indultu ka oinsa iha fulan sira mai ne’e,” Xefe Governu ne’e hakotu.

Jornalista: Vito Salvadór