Hatutan.com, (22 Marsu 2024), Díli—Konfrontu área ai-mutin ne’ebé akontese iha Kinta (21/03) tuku 21:30 kalan, rezulta ema na’in-tolu kanek, sunu motór fixon ida no PNTL kaer ona ema na’in-neen.

Segundu Komandante Jerál PNTL, Komissáriu Polísia Pedro Belo.

Konfrontu ne’e deskonfia involve hosi Grupu Arte Marsiál (GAM) ne’ebé rezulta mane na’in-rua kanek iha ulun no feto ida hetan kanek iha kanotak sorin karuk, vítima hirak ne’e lori ona ba halo tratamentu saúde iha Hospital Nasional Guido Valadares (HNGV).

Lee Mós: Governu Kontínua Suspende Atividade GAM-GAR To’o Novembru 2024

Relatóriu hosi Polísia katak, kontinuasaun hosi konfrontu ne’e iha Sesta (22/03) tuku 2:00 madrugada ema deskoñesidu sunu motór fixon ida, no ne’e PNTL rasik identifika ona autór ne’e.

Advertisement

“Horkalan kaptura ema na’in-neen no agora prossesu la’o hela maibé komandu PNTL munisipiu Díli ho UEP orienta hela membru sira atu bá kaer uluk mak koordenadór GAM ranting sira iha Ai-mutin,” Segundu Komandante Jerál PNTL, Komissáriu Polísia Pedro Belo hateten iha Kuartél Jerál PNTL Caicoli Díli, Sesta (22/03).

Pedro Belo dehan, to’o agora seidauk hatene vítima sira nia naran inisiál tanba sei iha hela prossesu bá investigasaun.

“Ho situasaun sira ne’ebé mak akontese, ohin ami bolu-malu mai iha fatin ida-ne’e hodi fó hanoin bá malu hodi orienta servisu iha terrenu bele di’ak liu tán,” nia informa.

Komandante ne’e hatutan, Governu suspende hela atividade arte marsiál sira nian maibé sira nia estrutura sira la’o nafatin.

Tanba ne’e maka PNTL orienta katak bá problema sira ne’ebé akontese hanesan iha Aimutin ne’e presiza bolu sira nia koordenadór ranting ne’ebé mak hela iha bairru ne’ebá ho estrutura atu rezolve problema ne’e.

Advertisement

Polísia mós sei halo investigasaun bá koordenadór ranting sira hodi husu tanba saida mak problema ne’e mosu hanesan ne’e,  to’o ema balun kanek inklui sunu sasan, tanba ne’e mak Komandante sira agora dadaun tun ona iha terrenu hodi haree situasaun ida-ne’e.

Pedro Belo alerta katak, situasaun ida-ne’e labele tolera bebeik hodi akontese problema tanba problema ne’ebé mak iha ona labele ka’it fali grupu hodi asalta-malu atu estraga komunidade nia sasan no ema sira ne’ebé inosente mós bele sai fali vítima.

“Ha’u nia komitmentu ida ne’ebé mak forte mak ne’e, se halo atuasaun makas bá grupu sira ne’ebé mak gosta halo provokasaun iha Dili laran liuliu bá sira ne’ebé mak gosta lori malu bá asalta malu,”  Pedro Belo dehan.

Segundu Komandante afirma, koordenador GAM sira hosi nasionál, munisipál no mós ranting sira iha bairru mak tenki responsabiliza tanba ida-ne’e maka komandante sira tun hodi bolu malu tuur hamutuk atu rezolve ida-ne’e.

“Bainhira halo bebeik hanesan ne’e labele. Ita lakohi, ita presiza hakmatek tanba la iha organizasaun ida atu boot liu fali seguransa Estadu nian. Ne’e laiha. Ita sei foti medidas forte hasoru sira,”nia ko’alia makaas.

Advertisement

Komandu PNTL aviza nafatin bá GAM sira katak, orsida kalan hotu-hotu tuur hakmatek iha idak-idak nia uma.

Parte seguransa mós nota katak, ema mai barak hodi halo disturbiu iha Aimutin ne’ebá durante konfrontu ne’e deskonfia ne’e ema ruma mak orienta no hosi hahalok sira hanesan ne’e maka koordenadór iha Ai-mutin nian atu halai bá to’o iha ne’ebé mós PNTL sei buka tuir no tenki responsabiliza.

Jornalista Estajiáriu:  Lázaro Pereira Quefi

Advertisement