Hatutan.com, (27 Marsu 2024), Díli—Prezidente Repúblika (PR), José Ramos-Horta husu atu Polísia Nasionál Timor-Leste (PNTL) tenke servi povu ho respeitu bá direitu umanu.

Prezidente Repúblika, José Ramos-Horta partisipa serimónia aniversáriu PNTL bá dala-XXIV ne’ebé hala’o iha Kuartél Batalliaun Ordem Públiku (BOP) Bairru-Pité, Kuarta (27/03/2024). Foto: Elio dos Santos da Costa.

José Ramos-Horta hato’o deklarasaun ne’e iha diskursu aniversáriu PNTL bá dala-XXIV ne’ebé hala’o iha Kuartél Batalliaun Ordem Públiku (BOP) Bairru-Pité, Kuarta (27/03/2024).

Lee Mós: Tinan 24 Ezisténsia PNTL, Entre Difikuldade ho Profisionalízmu

“Ha’u nia mensajen bá PNTL mak ne’e. Buka servi povu, Estadu ho respeitu ba direitu umanu, tuir étika profisionál ita hotu-hotu nian. Estadu ho Governu fó meius di’ak liu tán ba PNTL no ba F-FDTL no instituisaun sira seluk atu servi Estadu di’ak liu tán. PNTL hanesan F-FDTL instutisaun rua ne’ebé garante dame no seguransa, labele hetan foer ruma iha sira nia naran, tenke iha disiplina 100%,” Prezidente Repúblika hateten.

Xefe Estadu hatutan, PNTL tenke iha kompeténsia téknika, kompeténsia operasionál no mós hanesan auto sufisiente, rejilia, ne’ebé bele hamrik ho nian ain rasik, kuandu iha krime ruma, bele monu no  bele  hamrik fila fali.

Nia dehan, Timor-Leste deve buat barak mós ba iha parseiru internasional sira, hanesan Australia, Xina no Koreia do Sul, Estadus Unidus Amerika no Indonézia, Japaun, Malazia no Nova Zelándia ho Portugal, Reinu Unidu, sira hamutuk ho PNTL tinan 20 nia laran.

Ramos-Horta mós hato’o agradesimentu boot liu tan, espesial ba programa Timor-Leste Police Development Program (TLPDP), hosi Polisia Federal Australia (AFP).

“Hakarak agradese ba Indonezia, parseiru ida importante liu ba ita tanba Fronteira terestre no Fronteira maritima, kolaborasaun di’ak tebes-tebess, Indonézia tulun ita, seitor seguransa no seitor politika, ita nia adezaun ba ASEAN, Indonézia esforsu  no elementu imigrasaun no elemnetu polísia, atu ita bele  tama didiak iha ASEAN,” nia agradese.

Ramos-Horta dehan, Timor tenke kontinua nafatin moris iha  dame nia laran, la iha konflitu armadu no la iha  gerra sivil no la iha tensaun relizuzu ka etniku.

Nia hatutan, iha mundu ne’ebé haree daudaun, difisil tebes-tebes iha rai barak tebes-tebes,  pelus menus iha Timor buka matein nafatin hanesan illa ida paz.

PNTL tenke akumula feto

Prezidente Repúblika, José Ramos-Horta.

“Ha’u sempre hateten bebeik,  tenke mobiliza liu tan, no loke odamatan liutan ba partispasaun feto iha ita nia Polísia no sosiedade. Feto reprezenta 50% iha Timor-Leste, iha tinan rua nolu resin haat nia laran, la iha evidensia ne’ebé mane matenek liu feto, pelu kontráriu evidénsia hatudu kontráriu. Entaun ita haree la’ós de’it iha Polísia no forsa armada no iha seitór politika, fo fatin liu tan ba feto,” Prezidente Repúblika hateten.

Ramos-Horta subliña hakarak atu Timor-Leste iha forsa polisial ida aas liu iha mundu, hanesan liberdade imprensa iha Timor numeru 10 iha mundu no numeru um (1) iha sudeste Aziátiku.

PNTL tenke halo parte iha grupu, instutisaun polisia iha mundu ne’e numeru 10, leten liu ho komportamentu ne’ebé di’ak liu, nune’e mos forsa armadas F-FDTL.

Jornalista: Vito Salvadór