Hatutan.com, (25 Marsu 2024), Díli– Bankada Parlamentár FRETILIN, Segunda (25/03/2024), halo deklarasaun polítika iha plenária Parlamentu Nasionál hodi aprezenta sira-nia duvida no kestiona projetu Greater Sunrise ne’ebé to’o ohin loron seidauk iha finalidade.

Lee Mós: Austrália Lataka Dalan Kadoras Greater Sunrise Dada Mai TL

Membru PN hosi Bankada FRETILIN, Antóninho Bianco. Foto/Elio dos Santos da Costa

Membru  Bankada FRETILIN,  Antoninho Bianco, haktuir prozisaun polítika Bankada FRETILIN nian kona-bá tratadu Fronteira Maritima ne’ebé entrega 30% Greater Sunrise bá Australia halo tiha Timor-Leste labele deside mesak, maibé tenke rona preferénsia Governu Austrália nian.

“FRETILIN husu bá IX Governu  atu espliká, tanbasá mak ita manan ona Fronteira Maritima maibé labele manan Greater Sunrise hotu? Ita manan duni ka keta ita lakon hela, maibé povu fiaar katak ita manan?,” Deputadu Antoninho Bianco haktuir deklarasaun polítika Bankada FRETILIN nian.

Advertisement

Nia espliká iha VIII Governu hahú hosi Jullu 2020 to’o 2023, iha progresu positivu lubuk tanba dokumentu esbosu Production Sharing Contract (PSC) no Joint Operating Agreement (JOA) sira kuazé iha avansadu maka’as. Purvolta, 80% husi termus legais sira iha Petroleum Mining Code (PMC ) no PSC hetan ona aliñamentu entre Sunrise Joint Venture (SJV) no Governu Austrália ho Timor-Leste.

“IX Governu nia servisu ne’e atu finaliza restu 20%,  maibé, to’o Marsu 2024 ona mós dokumentu importante rua ne’e seidauk finaliza. Bankada FRETILIN kestiona kapasidade ekipa traballu iha Ministériu Petroleu no Rekursu Mineral bá servisu ida-ne’e,” Nia lamenta.

Nia akresenta, iha tinan 2021 TIMOR GAP konklui estudu tekniku Competent Person Report (CPR)  hodi konfirma rekursu petroleum (2C Resources) iha kampu Greater Sunrise.

“Inserteza bá kampu Greater Sunrise ne’e mós mosu tanba IX Governu muda tun sa’e nia planu sira kona-bá projeitu Tasi Mane. Estudu sira bá futuru planta refinaria Betano no libertasaun rai iha futuru planta LNG iha Beaço konklui hotu ona, maibé IX Governu muda fali fatin sira ne’e bá fali Natarbora mak sei halo progresu desenvolivmentu Greater Sunrise nian sai naruk liután,” Nia espliká.

Iha fatin hanesan membru PN hosi Bankada CNRT, Gabriel Soares konsidera deklarasaun ne’e falsu iha tempu kuaresma, tanba IX Governu iha prinsípiu atu dada kadoras mai Timor-leste.

Advertisement

“Ne’ebé ne’e hanesan kanta de’it iha tempu kuarezma hanesan diabu sira dehan ka’er nia no hedi nia bá kruz mak nune’e duni, tanba povu hatene, tanba ne’e aprésia bá PM Xanana tanba konvense nasaun tomak hodi manan duni. CNRT promete ona oinsa dada kadoras mai Timor-Leste,” Nia hatán bá deklarasaun politíka bankada FRETILIN nian ne’e  iha PN.

Seluk fali, Vise-Ministru Asuntu Parlamentár Áderito da Costa Hugo  ne’ebé asiste no hola parte iha plenária PN ne’e hateten, IX Governu promete ona sei dezenvolve kampu Greater Sunrise, nune’e laiha duvida atu dada kadoras mai Timor-Leste.

Jornalista Estajiária: Zita Menezes

Advertisement