Hatutan.com, (02 Abríl 2024), Díli– Prezidente Komisaun D Parlamentu Nasionál (PN) bá asuntu Ekonómia no Dezemvolvimentu, Ricardo Baptista hateten Governu nu’udár orgaun ezekutivu bele sosa asaun Timor Telecom karik lori reseita bá kofre Estadu.
Lee Mós: Governasaun Xanana Halo Hela Avaliasaun bá Sosa Asaun Oi iha Timor Telecom
Prezidente Komisaun D Parlamentu Nasionál (PN) bá asuntu Ekonómia no Dezemvolvimentu, Ricardo Baptista. Foto/Tome da Silva
Iha loron 03 fulan-Maiu 2023, VIII Governu Konstitusionál liuhosi Ministru Finansa, Rui Augusto Gomes ne’ebé reprezenta Estadu Timor-Leste asina kontratu sosa asaun (saham) operadór telekomunikasaun Oi nian iha Timor Telecom.
Estadu Timor-Leste nia partisipasaun ka asaun/saham iha Timor Telecom dezde inísiu 20,59% no bainhira sosa tan Oi nia asaun 57,09% nune’e sa’e ka aumenta bá 77,65% ho montante orsamentu millaun $21,1.
“Ko’alia kona-bá Timor Telecom enfrenta problema finanseiru, ha’u laiha informasaun kona-bá ida-ne’e. Maibé, ha’u ko’alia liu kona-bá bisnis Timor Telecom nian prezensa iha ne’e nu’udár kompañia telekomunikasaun ne’ebe fornesese rede telekomuniakasaun bá ita. Sé Governu haree katak ida-ne’e oportunidade di’ak hodi bele hetan reseita di’ak mai ita nia Estadu bele sosa asaun Oi nian iha Timor Telecom,” Deputadu Ricardo Baptista hateten iha PN, Tersa (02/04/2024).
Nia mós espliká iha 2023 Governu asina kontratu hodi sosa asaun Oi nian nune’e Governu atuál sé hakarak kontinua kontratu no lori reseita bá Estadu, bele estuda bá depois halo analiza didi’ak para ninia problema ne’e keta lori fali problema mai Estadu.
Durante ne’e Komisaun D PN seidauk halo fiskalizasaun kona-bá operador telekomunikasaun Timor Telecom tanba la’ós iha sira nian área, maibé kona-bá investimentu iha ligasaun mós iha komisaun D nian área.
Jornalista Estajiária: Zita Menezes