Hatutan.com, (04 Abríl 2024), Dili—Arguidu na’in-rua ho inisiál DLFS no AA, iha Kinta 04 Abríl 2024 tuku 04:00 lorokraik, submete bá primeiru interrogatóriu judisiál iha Tribunál Judisiál Primeira Instánsia Díli (TJPID) tanba involve iha kazu na’ok sasán iha kapitál Díli.

Arguidu na’in-rua ho inisiál DLFS no AA, iha Kinta 04 Abríl 2024 tuku 04:00 lorokraik, submete bá primeiru interrogatóriu judisiál iha Tribunál Judisiál Primeira Instánsia Díli (TJPID) tanba involve iha kazu na’ok sasán iha kapitál Díli. Foto: Tomé da Silva.

Observasaun Hatutan.com iha terrenu nota, arguidu sira asegura hosi ekipa investigasaun kriminál nasionál ho karreta, to’o iha Tribunál Dili iha tuku 13:45 oras meiudia.

Lee Mós: Forsa Konjunta Kaptura Suspeitu Na’in-rua bá Kazu Na’ok Sasán

Daudaun ne’e, Tribunál hala’o namanas prossesu inkéritiu bá arguidu sira hodi hein desizaun, ka medida koasaun saida mak sei aplika bá sira.

Audiénsia Primeiru Interrogatóriu ne’e prezíde hosi Juiz Ercília de Jesus, Ministériu Públiku (MP) reprezenta hosi Prokuradór Pedro Baptista, Defensoria Públika liuhosi Defensora Agostinha Oliveira mak fó asisténsia legál bá arguidu sira.

Iha Tersa (02/04/2024), Forsa konjunta hosi Departamentu Investigasaun Kriminál Nasionál (DIK), Servisu Informasaun Polísia (SIP), Polísia Nasionál Timor-Leste (PNTL), no Servisu Informasaun Militár ho Unidade FALINTIL hosi FALINTIL-Forsa Defeza Timor-Leste (F-FDTL) kaptura autór na’in-rua ne’e tanba deskonfia durante ne’e na’ok sasán iha kapitál Díli.

Arguidu na’in-rua ho inisiál DLFS no AA, iha Kinta 04 Abríl 2024 tuku 04:00 lorokraik, submete bá primeiru interrogatóriu judisiál iha Tribunál Judisiál Primeira Instánsia Díli (TJPID) tanba involve iha kazu na’ok sasán iha kapitál Díli. Foto: Tomé da Silva.

Informasaun ne’ebé Hatutan.com asesu hosi pesoál sekreta balun iha tempu ne’ebá katak, autór na’in-rua ne’e, Forsa Konjunta kaptura ho baze bá Mandadu Detensaun hosi Tribunál Judisial Primeira Instánsia Díli (TJPID) ho NUC : 0060/24.PNSIC.

Autór sira ne’e kaptura iha Tersa (02/04/2024) tuku 15:00 Otl, iha área Díli laran, maibé hosi fatin diferente.

Inisial AA kaptura iha área Kampung-Alor Gang-1, Suku Kampung-Alor, Postu-Administrativu Dom Aleixo, iha  tuku 16:00 Otl no suspeitu ho inisiál DLFS, kaptura iha área hela-fatin Audian Top-one, Aldeia Beheda, Suku Santa-Kruz, Postu-Administrativu Na’in-Feto, iha  tuku 15:46 Otl.

Iha Mandadu Detensaun hosi Tribunál Díli nian ne’e haktuir katak, arguidu sira komete iha kríme Furtu-Agravadu, Artigu 252, Lei Kódigu-Penál Timor-Leste.

Molok ne’e sira na’in-rua submete hela bá investigasaun no  detensaun iha sela Polísia Munisípiu Díli, durante oras 72.

Jornalista: Rogério Pereira Cárceres