Hatutan.com, (05 Abríl 2024), Díli- Vise-Primeiru-Ministru no Ministru Koordenador bá Assuntu Ekonomia no Ministru Turizmu no Ambiente, Francisco Kalbuadi Lay, hateten Governu iha kompromisu apoiu setór kooperativa nu’udár meius bá promove dezenvolvimentu sustentavel, hasa’e kresimentu inklusivu no harii fundasaun bá futuru ida ne’ebé prospéru liu.

Lee Mós: IFC-World Bank Hakarak Promove Investimentu Seitór Privadu Hodi Diversifika Ekonomia TL

Vise-Primeiru-Ministru no Ministru Koordenador bá Assuntu Ekonomia no Ministru Turizmu no Ambiente, Francisco Kalbuadi Lay. Foto/Espesiál

Vise-Primeiru-Ministru no Ministru Koordenador ba Assuntu Ekonómiku no Ministru Turizmu no Ambiente Francisco Kalbuadi Lay hato’o deklarasaun ne’e iha abertura bá reuniaun koordenasaun dahuluk ho movimentu kooperativa sira ne’ebé organiza husi Sekretária Estadu Kooperativa (SEKOOP) iha salaun apuramentu CNE, Díli, Kinta (04/04/2024).

Iha diskursu, Vise-Primeiru-Ministru no Ministru Koordenador ba Assuntu Ekonómiku no Ministru Turizmu no Ambiente husu ba movimentu kooperativa sira atu kontinua serbisu no serbisu nafatin atu bele aumenta no hasa’e produsaun iha rai-laran hodi bele kontribui ba hasa’e kresimentu ekonomia família nian.

“Ha’u lori Vise-Primeiru Ministru, Ministru Koordenador ba Asuntu Ekonómiku kongratula no  hato’o parabéns ba Sekretáriu Estadu ba Kooperativa ho ninia komponente sira hotu mai husi teritóriu laran tomak. Ha’u fó hanoin de’it katak, dezenvolvimentu sustentabilidade, kresimentu inklusivu, nune’e mós apóiu politika no investimentu liu-husi movimentu kooperativa sira, ne’ebé sai nu’udár meius ida ne’ebé mak forte hodi promove ho dezenvolve ekonomia familia nian, liu-husi reforsu movimentu ida-idak bele fó kbi’it ba familia sira, harii komunidade sira ne’ebé forte liu, promove dezenvolvimentu sustentavel, promove kresimentu inklusivu no harii fundasaun ba futuru ida ne’ebé prospéru liu, tanba ne’e, mai ita halo fali esforsu atu apaiu kooperativa sira hanesan baze ekonomia família,” Francisco Kalbuadi Lay afirma.

Enkontru koordenasaun ne’e vital no importante tebes, tanba ne’e Vise-PM Francisco Kalbuadi Lay aproveita oportunidade hodi sujere no husu bá  jestor movimentu kooperativa sira atu aproveita oportunidade ida ne’e, hodi troka hanoin bá malu husi munisípiu ida bá munisípiu seluk, tanba governu atual hahú ohin ba oin mak sei konsentra liu-ba krésimentu ekonomia.

“Ita tenki dudu ekonomia bá oin, hahú husi ekonomia mikro depois ba makro.” Nia sublina.

Total movimentu kooperativa 219 hosi ramu 16, no Federasaun Kréditu hamutuk rua, membru hamutuk na’in-30.507 ho ninia kapital hamutuk  $15.971.588,68.

Jornalista: Vito Salvadór