Hatutan.com, (15 Abríl 2024), Díli—Deputadu bankada FRETILIN Antoninho Bianco husu Ministériu Finansa (MF) atu halo klarifikasaun bá Primeiru Ministru (PM), Kay Rala Xanana Gusmão ne’ebé sempre deklara iha diskursu sira kona-bá orsamentu Estadu ho montante hosi millaun $30 to’o millaun $40 lakon.

“Ha’u rona intervensaun politíka barak liu-liu Primeiru Ministru dehan osan lakon. Dalaruma hateten dehan millaun $30 la kle’ur dehan millaun $40 mak lakon maibé ha’u la hetan iha relatóriu ne’e. Ministra Finansas tenki hateten loos tanba ita labele ko’alia buat balun duun-malu iha dalan, iha média dehan osan lakon,” Antoninho Bianco hateten iha diskusaun relatóriu Kuatru Trimestrál tinan finanseiru 2023 iha plenária, Segunda (15/04/2024).

Lee Mós: Governu Halo Poupansa Billaun $1,5 bá Levantamentu Osan hosi Fundu Mina-rai

Antoninho Bianco dehan, osan sira ne’ebé tranfere hosi nível prosedimentu Ministériu Finansas nian bá konta bankária ne’ebé rekoñese hosi Governu sera-ké ida-ne’e legál ka ilegál.

“Bainhira tranferénsia ne’e hosi Ministériu Finansas bá konta bankária ne’ebé Governu rasik aseita tuir dalan legál. Tanba saida mak ita hateten dehan osan ne’e lakon. Ha’u hanoin MF mak hatene tanba kriasaun kualkér bankária ne’e iha prosedimentu ne’ebé Governu tenki hatene,” nia hateten.

Tuir nia haree katak, iha fatin-fatin konta bankária instituisaun EP no IP sira balun halo ikus-mai konta bankária iha líder Komunitária entaun labele hateten no duun-malu.

Kona-bá ne’e, Ministra Finansas, Santina Viegas Cardoso hateten orsamentu ne’ebé mak lakon millaun $30 ka millaun $40 ne’e,  Ministériu Finansas bele halo maka bainhira iha tinan nia rohan hanesan taka konta tinan 2023.

“Ita bele halo rekonsialiasaun. Tinan ida-ne’e Diresaun Nasionál Tezouru hakerek karta barak bá banku hotu-hotu no entidade barak atu hato’o loloos informasaun sira kona-bá sira nia posizaun bá orsamentu iha konta ida-idak nian. Bainhira konta ne’e seidauk rejista hosi tezouru, ne’e ami tenta atu nafatin iha fila-fali kontrolu ida atu kontinua nafatin, atu hatene katak konta hotu-hotu ne’ebé iha banku sira liuliu tau Orsamentu Jerál Estadu,” Santina Viegas Cardoso  hateten.

Jornalista Estajiária: Zita Menezes