Hatutan.com, (17 Abríl 2024), Díli- Prezidente Parlamentu Nasionál (PPN), Maria Fernanda Lay hateten Parlamentu Nasionál apoia polítika Sekretáriu Estadu Asuntu Toponímia no Organizasaun Urbana (SEATOU) hodi organiza sidade Díli sai Moos, Organizadu, Saudavel, no Seguru.

Lee Mós: Governu Sei Transforma Sidade iha Territóriu Nasionál Sai Moos, Organizadu, Saudavel no Seguru

PPN Maria Fernanda Lay. Foto/Mídia GPR

PPN Maria Fernanda Lay hato’o deklarasaun ne’e relasiona ho atuasaun ne’ebé SEATOU halo hodi muda vendedór ambulante no hasai obrigatóriu sidadaun sira ne’ebé okupa espasu públiku seim autorizasaun hosi autoridade kompetente.

“Ha’u defende povu, mas povu bá fatin ne’ebé permitidu, labele disturba orden públiku, la bele hela iha  valeta nia leten, mota Bidau labele bá basar iha ne’ebá, inundasaun hakilar Governu, ita hatene iha lei dehan, tasi ibun ho mota ninin dentru  metru  50 labele halo uma. Ami defende povu, mas Governu nia polítika mós defende povu ne’e duni, tanba bainhira iha área risku iha dezastre naturá ita lakon ona ita-nia vida mak ita hakilar dehan Estadu la tau matan, la’e, ita tenke husu autorizasaun no kumpre orden públiku,” Maria Fernanda Lay bá jornalista sira hafoin remata enkontru ho Prezidente Repúblika José Ramos-Horta iha Palásiu Prezidensiál, Kuarta (17/04/2024).

PPN hatutan halo basar ka merkadu iha mota ninin,  fo’er hotu soe ba mota laran, labele nune’e. Nune’e, nia parte  agradese SEATOU pelumenus arredores iha fatin balun fahi-teen la iis ona.

Nia hateten klaru katak situasaun tanba ekonomia dezenvolve de’it iha sidade kapitál, iha fatin seluk la’e, maibé situasaun ne’e tenke nei-neik, primeiru tenke fó estabilidade polítika rai laran, labele bá baku malu, labele moris ho funsionalizmu públiku ida-ne’e mak problema bo’ot. Hotu-hotu tenke garante estabilidade polítika iha país, estabilidade seguransa iha país, ema mai halo investimentu sei hetan benefísiu husi ne’ebá.

Jornalista: Vito Salvadór