Hatutan.com, (18 Abríl 2024), Díli—Ekipa konjunta kompostu hosi Inspeção Geral Jogo (IGJ), Polísia Nasionál Timor-Leste (PNTL), Polísia Científica Investigação Criminal (PSIC), Polísia Nasionál Servisu Investigasaun Criminál (PNSIC), Prezidente Autoridade Munisipiu (PAM), kontinua halo sosializasaun kona-bá rezolusaun Governu númeru 14/2024 loron 20 fulan marsu kona-bá suspensaun temporária bá atividades bola guling iha territóriu nasionál.

Ekipa konjunta kompostu hosi Inspeção Geral Jogo (IGJ), Polísia Nasionál Timor-Leste (PNTL), Polísia Científica Investigação Criminal (PSIC), Polísia Nasionál Servisu Investigasaun Criminál (PNSIC), Prezidente Autoridade Munisipiu (PAM), kontinua halo sosializasaun kona-bá rezolusaun Governu númeru 14/2024 loron 20 fulan marsu kona-bá suspensaun temporária bá atividades bola guling iha territóriu nasionál, Kinta (18/04/2024. Foto: Leopoldina de Carvalho.

Inspetór IGJ, Aníbal de Carvalho Martins hateten, atividade sosializasaun ne’e kontinuasaun hosi maneira oin-oin ne’ebé mak ekipa halo ona mak hanesan, primeiru haruka karta bá operadór sira bola guling nian atu taka atividade, segundu prodús komunikadu imprensa no ikus liu maka sosializasaun hodi konvida admistradór munisípiu, autoridade lokál sira hanesan Xefe suku no xefe aldeia sira.

Lee Mós: Operadór Bola Guling Kumpre Rezolusaun Governu Suspende Atividade Provizóriu

“Iha ne’ebá ita transmite informasaun bá komunidade atu bele ezekuta to’o iha baze, katak bainhira rezolusaun ne’e vigora ona signifika atividade bola guling taka provizóriu hodi hein desizaun Governu nian atu bele reativa fali,” Aníbal de Carvalho Martins hateten iahsalaun municipal Dili, Kinta (18/04/2024).

Aníbal Martins esplika, bainhira rezolusaun Governu númeru 14/2024 vigora ona, ne’e sei aplika bá operadór bola guling hotu-hotu inklui sira ne’ebé rejistadu no la rejistadu.

“Governu rekoñese katak, atividade bola guling iha territóriu nasionál balun hetan lisensa hosi Governu ne’ebé bolu karákter permanente, balun bolu ilegál, maibé bainhira rezolusaun ne’e vigora sira tenki kumpri,” nia esplika.

Tanba ne’e, IGJ servisu hamutuk ho PNTL, PSIC NO PNSIC kontinua halo operasaun hodi identifika atividade jogu bola guling no mós atividade jogu ilegál seluk ne’ebé komunidade kontinua halo iha bairru sira, iha mate uma ka fatin saida de’it, nune’e ekipa sei halo greve, sei prende operadór sira, ne’ebé sei halo hosi PCIC no PNSIC sei kaptura hodi bá halo investigasaun.

Bainhira idenfika atividade bola guling balun sei la’o, ne’e IGJ konsidera krime, nune’e bainhira identifika mak ekipa PNSIC HO PSIC sei halo investigasaun hodi bele aplika sansaun hanesan pena ka kastigu.

Rezolusaun ne’e Importante

Diretór Jeral PCIC, Vicente Soares de Brito esplika razaun Governu kria rezolusaun ne’e tanba bazeia bá observasaun hosi ekipa nota katak, jogu ne’e involve númeru komunidade bá assesu jogu ne’e as no aumenta krimi.

“Ita haree jogu sira ne’e involve ema barak mak bá. Ne’ebé bele hamosu problema oin-oin. Tanba ne’e Governu foti desizaun hodi halo suspensaun no kria rezolusaun ne’e,” nia hateten.

Tuir PCIC, rezolusaun ne’e iha elementu importante 3 mak hanesan: primeiru, suspende provizóriu bá empreza bola guling ne’ebé hetan lisensa no mós ba sira ne’ebé lisensa mate ona sei la halo prolongasaun, at liu bá sira ne’ebé laiha lisensa, ne’e ilegál.

Segundu maka, asaun IGJ, só inspetór Jeral de’it mak iha kompeténsia halo atividade fiskalizasaun ne’ebé sei hetan apoiu hosi PNTL, PCIC, PNSIC no PAM, inklui autordade lokál sira, Admistradór Postu Admistrativu.

Terseiru, sei halo revizaun bá dekretu lei númeru 6/2016 loron 20 fulan abril, sei iha alterasaun ka la’e.

Iha fatin hanesan, Xefe Suku Fatuhada, Marcelino Soares konsidera rezolusaun Governu ne’e importante tanba bele hakmaan autoridade lokál sira nia servisu hodi kontrola komunidade, maibé husu Governu atu suspende mós jogu seluk.

“Ami sujere ba Governu labele halo diskriminasaun. Temi dehan jogus ne’e taka hotu, labele bola guling deit,” Marcelino Soares sujere.

Nune’e mós Prezidente Autoridade Munisipiu Dili, Gregório Saldanha husu bá xefe suku no xefe aldeia sira atu koopera di’ak ho ekipa konjunta hodi bele lori informasaun to’o iha baze tanba sira nia prezensa besik liu ho kominidade.

Jornalista: Leopoldina de Carvalho