Hatutan.com, (01 Maiu 2024), Díli—IX Governu Konstitusionál sei prodús rezolusaun ida hodi sai hanesan baze legal bá Governu hodi selu projetu obras publika 62 ne’ebé sai polémika tanba laiha formalizasaun kontratu.

Lee Mós: Projetu 62 Laiha Formalizasaun Kontratu, Komisaun E Husu MOP Foti Prosesu Tuir Baze Legál

Ministru Obras Públika, Samuel Marçal. Foto/Elio dos Santos da Costa

Ministru Obras Publika (MOP), Samuel Marçal, hateten tuir verifikasaun hosi Ajénsia Dezenvolvimentu Nasionál, Institutu Públiku  (ADN,I.P) katak projetu obras publika 62  ne’e iha 21 ida mak verifika hotu ona no hosi rezultadu verifikasaun hatudu katak projetu balun on going hela, balun atinje ona 100%, balun 50%, balun 40% no balun 20%, maibé Governu anteriór la konsege halo pagamentu. Tanba ne’e, Governu buka hela kria rezolusaun ida para bele rezolve.

“Projetu ne’e mak  antes ne’e bolu P44 ne’ebe uluk liu kompañia sira halo ona 50%, balun 20%, balun 40%, balun 100%, maibe la konsege halo pagamentu, no sai hanesan polémika ida ne’ebe bá mai Parlamentu Nasionál depois bá fali Konsellu Ministru,” Ministru Samuel Marçal hateten hodi responde jornalista sira iha iha Palásiu Governu,  Tersa ( 30/04/2024).

Samuel Marçal dehan, kompañia hirak ne’e hosi Timoroan no barak liu mak simu ona ordem traballu hodi halo servisu, maibe la konsege halo pagamentu, nune’e, rezolusaun husi Konsellu Ministru   hodi halo pagamentu bá projetu hirak ne’e.

Komisaun Nasionál Aprovisionamentu (CNA, sigla portugés) halo ona anúnsiu no sei halo prosesu kontratu, no ADN sei halo verifikasaun hafoin sei haruka  bá Konsellu Admistrasaun Fundu Infraestrutura (CAFI, sigla portugés) hodi halo aprovasaun hafoin bele submete ba CNA hodi prepara kontratu.

Hafoin ne’e sei halo tan verifikasaun bá projetu hirak ne’ebe atinji ona 100%  hodi haree kualidade obra, nune’e bele halo pagamentu no  bá hirak ne’ebe sidauk remata sira tenke kontinua to’o remata, ho nune’e Governu  bele selu fali obra hirak ne’ebe sira halo ona. Projetu hirak ne’e kompostu husi estrada, ponte, moru protesaun, bronjong iha tipu oin-oin deit.

Labele Konstrui Uma iha Foho Leten

Liga ho eviksaun ne’ebé halo  hosi ekipa Sekretária Eatadu assuntu Toponímia no Organizasaun Urbana ( SEATOU) hodi muda komunidade sira ne’ebe okupa espasu públiku ka rai estadu,  Ministru Obras Públika, Samuel Marçal husu bá komunidade sira atu keta aumenta konstrusaun uma iha foho leten, tanba fó rísku ba komunidade sira iha rai tetuk.

“Díli ne’e ita hotu nian, husu bá sira karik sai husi fatin sira ne’e labele bá hela fali iha foho leten, tanba udan boot mai, tetuk iha Díli laran ne’e mak sai vítima bo’ot tanba ita muda sae bá foho leten loke estrada, halo uma, udan mai lori rai-ten  halai hotu mai tetuk,” Samuel Marçal fó hanoin.

Jornalista: Leopoldina de Carvalho