Hatutan.com, (15 Maiu 2024), Díli-Polisia Nasionál Timor-Leste (PNTL) Munisípiu Díli, kaptura no detein  suspeitu na’in-14 tanba envolve iha kazu konfrontu ka tuda-malu entre juventude sira iha área Ai-tarak Laran ho Kampung Alor iha Tersa kalan (14/05/2024).

Segundu Komandante jerál PNTL, Komisáriu Pedro Belo. Foto/Tome da Silva

Kronolojia ne’ebé  aprezenta  husi autoridade polísia katak, kazu ne’e mosu bainhira juventude sira iha bairru Ai-tarak Laran hala’o hela enkontru ida ne’ebé atu ko’alia no diskute kona-bá sira-nian preparasaun hodi simu vizita ilas Santu António nian iha sira-nia bairru. Derrepente de’it fatuk ida deskonfia tuda hosi juventude balun kona loos iha katuas ida ninia ulun. Nune’e, juventude sira sente la satisfá  hodi halai sai bá, buka no husu tuir sé mak tuda. Maibé, laiha ema ruma mak hamriik iha estrada ibun. Ho ida ne’e maka joven sira iha Kampung Alor halo asaun, ikus mai mosu reasaun to’o problema ne’e sai boot.

Liga ho akontesimentu ne’e, PNTL liuhosi Servisu Informasaun Polisia (SIP) Nasionál, informa kedas bá komandu PNTL Díli liuhosi operasaun hodi halo atuasaun no normaliza situasaun iha terrenu. Maibé, molok polisia to’o, insidente ne’e rezultadu ona uma komunidade nian rua (2), motór haat, inklui karreta kór mean ida ho xapa matrikula B.13-236, mak hetan estragu ka rahun.

“Ami kaer ema  na’in-14, identifika ema na’in-tolu (3) ne’ebé maka maioridade,” Segundu Komandante jerál PNTL, Komisáriu Pedro Belo, informa bá jornalista sira, hafoin sorumutuk koordenasaun seguransa ho komandante munisípiu no unidade sira iha Kuartél Jerál PNTL, Caicoli-Díli, Kuarta (15/05/2024).

Komisáriu Pedro Belo dehan, suspeitu na’in-tolu ne’ebé ho idade sei minoria ne’e, parte komandu bolu ona mós inan-aman, entrega bá sira, no komandu mós fó hanoin ona bá inan-aman katak, tanba saida maka oan sira ne’e envolve iha problema, atu nune’e inan-aman mós tenke halo edukasaun iha uma-laran hotu.

Pedro Belo hateten labarik sira ne’e halo problema tanba falta kontrolu hosi inan-aman, entaun husik de’it oan sira ne’e la’o tun, la’o sa’e, ikus mai, envolve iha problema sira ne’e hotu.

Suspeitu sira na’in-14 ne’e, ho identidade inisiál BB (moris iha 1996), AMX (moris iha 2002), JGG (moris iha 2002), JMdC (moris iha 2005), TSdDB (moris iha 2006), MJdJC (moris iha 2001), RA (moris iha 2006), LM (moris iha 2003), NA (moris iha 2009), VdJdCP (moris iha 2009), JJS (moris iha 2008), GFB (moris iha 1995).

PNTL rejista mós Lezada ka vítima na’in-haat mak hanesan, Placido Sarmento de Oliveira (ninia motór no odamatan loja nian hetan estragu), Aquelina Lino dos Santos (motór hetan estragu), Abrão do Rosário (karreta hetan estragu), Amâncio Amaral (motór hetan estragu).

“Hirak e’ebé maka hanesan idade to’o ona, ita nia investigasaun sira ne’ebé maka iha munisipiu, oras ne’e daudauk koordena ho ministériu públiku, no prosesu ne’e kontinua la’o nafatin,” Komisáriu Pedro Belo, hateten.

Jornalista: Rogério Pereira Cárceres