Hatutan.com, (02 Juñu 2024), Díli- Prezidente Ukránia, Volodymyr Zelenskyy, Sábadu (01/06/2024), hasoru malu ho Prezidente Repúblika José Ramos-Horta iha Singapura hodi hato’o agradesementu ua’in  ba estadu no povu Timor-Leste ne’ebé fó apoiu ba soberania no integridade territoriál  Ukránia nian.

Lee Mós: TL Kontinua Kondena Konflitu Armadu iha Gaza-Ukránia Inklui Junta Militár Myanmar

Enkontru bilateral Prezidente Repúblika Ramos-Horta ho Prezidente Ukránia, Volodymyr Zelenskyy, iha Singapura, Sábadu (01/06/2024)/ Foto/Foti iha Twitter Prezidente Ukránia Zelenskyy Volodymyr

“Ami-nia enkontru ho Prezidente Repúblika Timor-Leste José Ramos-Horta, ida-ne’e nu’udár sorumutuk dahuluk iha istória ami-nia relasaun bilaterál nian. Ha’u apresia nia apoiu ba soberania no integridade territoriál iha rai-Ukránia, no mós rezolusaun importante sira ONU nian ne’ebé kondena agresaun Rusia nian,” Hatutan.com sita Prezidente Ukránia Volodymyr Zelenskyy nia Twitter ofisiál.

Prezidente Ukránia hatutan partisipasaun husi nasaun sira iha Sudeste Aziátiku nian iha Simeira Global ba Pás ne’e importante tebes, no agradese ba Prezidente Repúblika Timor-Leste, José Ramos-Horta tanba konfirma nia prezensa.

Zelenskyy subliña mós katak importante tebes ba hotu-hotu atu hahú prosesu harii dame ida-ne’ebé justu. “Importante tebes ba ita atu hahú prosesu harii dame ida-ne’ebé justu. Rusia lakohi hapara funu. Tan ne’e, tenke servisu hamutuk ho mundu tomak hodi hakbesik liután ba dame,” Zelenskyy afirma.

Iha komemorasaun loron proklamasaun independénsia Timor-Leste nian ba da-48 (28 Novembru 1975-2024) ne’ebé hala’o iha Palásiu Prezidensiál, José Ramos-Horta lori povu Timor-Leste nia naran hato’o solidariedade ba povu sira ne’ebé sai vítima ba konflitu ne’e.

Laureadu Nobel da Pás ne’e hateten agresaun Rúsia ba Ukránia  kompleta tinan rua iha 2024 tanba ne’e Timor-Leste kontínua solidáriu ho povu no Estadu Ukránia tanba agresaun armadu ida-ne’e hanesan violasaun bá direitu internasionál.   Konflitu ne’e destrui infraestrutura Estadu Soberanu no independente Ukránia nian no fó prejuizu ekonómiku no sosiál barak tebetebes hodi halo ema inosente barak sai vítima no rezulta iha exodus ba ema refujiadu sira tokon ba tokon.

Jornalista : Vito Salvadór