Hatuta.com, (06 Junu 2024), Dili—Tribunál Primeira Instánsia Díli (TJPID), iha kinta (06/06) hahú halo julgamentu bá kazu membru Policia Cientifica Investigação Criminal (PCIC) ne’ebé husu osan $2.000 bá Fuzitivu Arnolfo Teves Jr nia oan iha fulan hirak liu bá, hodi fó garantia bá nia iha prizaun.

Fujitivu Arnolfo Tevez Jr, sai sasin iha TJPID bá membru PCIC husu osan $2.000 bá nia oan mane atu garantia nia iha prizaun. Foto: Elio dos Santos da Costa.

Iha prosesu julgamentu dahuluk bá kazu ne’e ho ajenda hodi rona uluk deklarasaun hosi Arnolfo Teves Jr nu’udár sasin ba kazu ne’e.

Lee Mós: PCIC Suspende no Averigua Membru Ne’ebé Deskonfia Husu Osan bá Oan Mane Fujitivu Alnolf Teves Jr

Defeza hosi arguidu fuzitivu Arnolfo Teves Jr, Advogadu Privadu, José Ximenes hateten, prezensa ida ne’e bá nia kliente Arnolfo Teves Jr mai iha Tribunál Primeira Instánsia Dili ohin, tanba Tribunál atu rona nia depoimentu hanesan sasin liga ho kazu membru PCIC husu osan bá sidadaun Filipina ne’e nia oan.

Arnoldfo Tevez Jr kontinua iha Becora iha prosesu ida relativamente ho membru balun husu osan bá nia oan tanba ida-ne’e mak ohin Tribunal rona nia hanesan testamuña bá kazu ida-ne’e.

“Bainhira Arnolfo Tevez Jr iha hela sala detensaun no nia kontinua bá iha Becora. Iha prosesu ida-ne’e  relativamente ho membru balun ne’ebé husu osan bá Teves nia oan. Tanba ida-ne’e mak ohin Tribunál rona nia hanesan testamuña,” José Ximenes hateten iha TJPID, Colmera.

José Ximenes hatutan, antes ne’e Gabinete Kombate Korrupsaun no krimininalidade organiza hodi lansa ona no mós notifika ona, presta ona deklarasaun nune’e ohin TJPID notifika nia atu fó ninia depoimentu tanba ne’e nia mai no foti ona nia depoimentu ne’e iha prosesu rua. Prosessu ida kona-bá husu osan ninian no prosesu seluk kona-bá matéria estradisaun.

“Matéria ida-ne’e ha’u labele pronunsia iha ne’e tanba ne’e kestaun étika profisionál. Ha’u labele presistensia iha ne’e. Tanba ida ne’e Tribunál nia kompeténsia. Ha’u mai akompaña de’it,” nia dehan.

Kazu membru PCIC husu osan bá Arnolfo Teves Jr ne’e akontese iha 8 fulan maiu 2024  iha ne’ebé membru PCIC ho inisiál OA husu osan ho montante $2.000 bá Fuzitivu Arnolfo Teves Jr nia oan ne’ebé momentu ne’e hein nia aman iha prizaun Becora.

Iha asaun ne’e, membru PCIC ho inisiál OA husu osan ho montante $2.000 ba Fuzitivu Arnolfo Teves Jr nia oan mane, atu nune’e PCIC husu ba Guarda Prizioneiru Becora atu garante seguransa ne’ebé di’ak ba nia aman Arnolfo Teves Jr. durante iha prizaun Becora.

Jornalista Estajiáriu: Lazaro Pereira Quefi