Hatutan.com, (18 Juñu 2024), Díli- Prezidente Repúblika (PR), José Ramos-Horta konkorda ho desizaun Governu liuhosi Konsellu Ministru nian hodi propoin bá Rui Pereira dos Santos atu lidera Comissão Anti Corrupção (CAC) bá mandatu tinan haat.

Lee Mós: CNRT ho KHUNTO husu Kandidatu Komisáriu CAC Rui Pereira Hala’o Kna’ar ho Imparsialidade

Prezidente Repúblika, José Ramos-Horta. Foto/Elio dos Santos da Costa

“Rui Pereira nia ema di’ak, buat ida mak ha’u rekomenda maka’as bá CAC favór haree didi’ak bá buat ne’ebé importante duni, ajuda kontribui atu hametin kombate korrupsaun, maibé ho mekanizmu ka ideia, rekomendasaun, la’ós de’it atu halo fali persegisaun hanesan polísia,” Prezidente Repúblika José Ramos-Horta bá jornalista sira iha edifísiu Ministériu Negósiu Estranjeiru no Kooperasaun (MNEK), Tersa (18/06/2024).

Xefe Estadu hatutan Komisáriu CAC tenke estuda didi’ak kazu sira, la’ós buat hotu-hotu korrupsaun, hanesan ministru ida sosa ekipamentu husi ne’ebé-ne’ebé depois haree ekipamentu ne’e sala, depois halo investigasaun ne’e korrupsaun, tanba dala ruma membru Governu sira hetan kondenasaun husi lia-bosok sira hosi ema li’ur mak barak.

Nia afirma liután katak buat balun la’ós korrupsaun, buat balun esperiénsia, ignoránsia ka neglijénsia, ne’e la’ós korrupsaun, buat hotu-hotu, buat ki’ik oan mós ema privadu ida sa’e karreta Estadu ne’e mós sira bá duni, klaru bainhira kaer karreta ne’e, lalika lori fali bá Tribunál.

“Komisáriu CAC tenke haree buat sira ne’e, ha’u konkorda no apoiu 100%, lei governu muda iha maioria simples de’it mós bele ona hili Komisáriu CAC,” Ramos-Horta haktuir.

Konsellu Ministrus delibera no propoin ona bá Parlamentu Nasionál hodi nomeia Rui Pereira dos Santos, hanesan Komisáriu Comissão Anti Corrupção, bá mandatu tinan haat (20242028).

Jornalista: Vito Salvadór