Hatutan.com, (21  Juñu 2024), Díli- Setór justisa Timor-Leste nian kontinua enfrenta problema menus rekursu umanu iha intemu kuantidade no kualidade.

Lee Mós: Grupu Traballu Reforma Justisa Submete Ona Relatóriu Servisu bá Primeiru-Ministru

Grupu Traballu bá Reforma Setór Justisa halo enkontru ho PPN no lider bankada Parlamentár sira, Sesta (21/06/2024). Foto/Tome da Silva

Relatóriu breve kona-bá Reforma Setór Justisa  ne’ebé aprezenta husi Grupu Traballu bá Reforma Setór Justisa  lidera husi antigu Ministra Justisa, Lúcia Brandão Lobato, hatudu katak dezde Timor-Leste restaura nia independénsia, husi 20 Maiu 2002 to’o ohin loron, númeru juis Timoroan foin na’in-28, prokuradór timoroan na’in-34 no defensór públiku timoroan foin na’in-34.  

“Ita iha problema boot ho rekursu umanu husi númeru kuantidade mós ita menus, agora ita iha juis na’in-28, prokuradór  na’in-34 ho defensor públiku mós na’in-34 ne’ebé hala’o sira-nia knaar iha timorla laran tomak. Ita ko’alia kona-bá kualidade sé númeru kuantidade mak uitoan ona ko’alia kona-bá kualidade hasoru dezafiu no kontinua sai dezafiu bá Estadu,” Lúcia Lobato informa bá jornalista sira hafoin halo audiénsia ho Prezidente Parlamentu Nasionál, Maria Fernanda Lay ho lider bankada parlamentár sira iha PN, Sesta (21/06/2024),

Nia afirma temi Estadu tanba  hotu-hotu tenke envolve duni iha ida-ne’e mak esforsu halo nusa mak bele hasa’e kapasidade   juis, defensór no prokuradór sira ho programa espesialidade ne’ebé mak besik mai, liuhusi reforma ida  metin liu bá sentru formasaun sira.

“Ida fali mak ita hahú rekruta ita nian joven  sira tenke  bá tama iha universidade kualidade no fakuldade diretu ne’ebé mak di’ak para depois bele forma sira sai profisionál iha área justisa nian,” Lúcia Lobato hateten

Harii Tán Tribunál iha Munisípiu Tolu

Lúcia Lobato informa aspetu importante seluk mak infra-estrutura haree katak, Governu iha planu atu loke tán tribunál tolu (3) iha Munisípiu tolu.

Daudaun ne’e Timor-Leste foin iha tribunál judisiál primeiru instánsia  haat (4), kompostu husi Tribunál  Judisiál Primeira Instánsia Díli, Baucau, Suai ho Oé-Cusse.

Tribunál Judisiál Primeira Instánsia sira ne’e nia distánsia dook husi populasaun no ladún iha atendimentu ida efikásia no efisiénsia liu bá prosesu justisa sira iha Tribunal tanba dala balun povu la partisipa iha julgamentu tanba hela dook husi Tribunál.

Iha relatóriu laran ne’e Grupu Traballu bá Reforma Setór Justisa propoin atu molok Governu ida-ne’e mandatu remata estabelese tan tribunál tolu hanesan Tribunál Judisiál Primeira Instánsia Ermera, Tribunál Judisiál Primeira Instánsia Viqueque no Tribunál Judisiál  Primeira Instánsia Bobonaro.

Prezidente Parlamentu Nasionál (PPN), Maria Fernanda Lay hateten Parlamentu Nasionál halo enkontru ho Komisaun Grupu Reforma bá Setór Justisa hodi haree sira-nia levantamentu diagnóstiku  kona-bá konseitu reforma justisa.

“Bainhira atu estabelese fasilidade justisa sira ne’e tenke prepara ona rekursu umanu ka prepara ema hodi bele servisu no halo atendimentu. Tanba ne’e Komisaun Grupu Traballu Reforma  Justisa tenke fó hatene saida mak tenke halo no Parlamentu Nasionál sei prepara ekipa ida hodi servisu hamutuk aselera prosesu sira ne’e hotu,” Maria Fernanda Lay  hateten.

Jornalista Estajiária: Zita Menezes