Hatutan.com, (22 Jullu 2024), Díli- Prezidente Repúblika (PR), José Ramos-Horta, Segunda (22/07/2024), iha Palásiu Prezidensiál  fó pose bá Roberto Sarmento de Oliveira Soares nu’udar Embaixadór Estraordináriu no Plenipotensiáriu foun Repúblika Demokrátika Timor-Leste (RDTL) bá Repúblika Indonézia (RI).

Lee Mós: Finaliza Fronteira Marítima TL-RI ho Espíritu Amizade no Kooperasaun

PR José Ramos-Horta fó posse bá Roberto Sarmento de Oliveira Soares nu’udar Embaixadór Estraordináriu no Plenipotensiáriu foun TL bá RI iha Palásiu Prezidensiál, Segunda (22/07/2024). Foto/Elio dos Santos da Costa

Embaixadór Roberto Sarmento de Oliveira Soares lori esperiénsia diplomátika barak iha nia papél foun. Nia servisu tiha ona nu’udar Asistente Espesiál ba Primeiru-Ministru Kay Rala Xanana no Xefe Ekipa Tékniku Negosiasaun ba Delimitasaun Fronteira Terrestre Timor-Leste. Ninia pozisaun anteriór sira inklui Sekretáriu Estadu bá Asuntu ASEAN no Vise-Ministru Negósiu Estranjeiru no Kooperasaun.

Embaixadór Roberto Sarmento de Oliveira Soares hala’o papél importante iha esforsu Timor-Leste nian atu tama ba ASEAN no lidera negosiasaun sira ba konkordánsia ho Santa Sé. Nia mós negosia Akordu Viza ho Uniaun Europeia (UE), hodi permite viajen livre husi vistu ba sidadaun Timor-oan bá nasaun UE sira.

Husi 2009 to’o 2012, nia dezempeña funsaun nu’udar Embaixadór dahuluk Timor-Leste nian ba Singapura no Brunei Darussalam.

Prezidente Repúblika José Ramos-Horta iha  konfiansa katak ho nomeasaun ne’e, Embaixadór Roberto Sarmento de Oliveira Soares sei haforsa liután kooperasaun bilaterál no amizade ne’ebé forte entre Timor-Leste no Indonézia.

“Nasaun rua ne’e fahe istória no halo progresu signifikativu iha dezenvolvimentu ligasaun diplomátika no ekonómika dezde independénsia Timor-Leste iha 2002. Timor-Leste no Indonézia kontinua hasa’e sira-nia kooperasaun bilaterál iha setór barak, inklui parseria ekonómika, jestaun konjunta ba fronteira no esforsu seguransa nian, interkámbiu edukasionál no kulturál, dezenvolvimentu infrastrutura, envolvimentu diplomátiku, no kooperasaun saúde.” Hateten Prezidente Repúblika José Ramos-Horta.

Nomeasaun Embaixadór Roberto Sarmento de Oliveira Soares subliña liután kompromisu Timor-Leste nian ba estabilidade rejionál no kreximentu ekonómiku iha Sudeste Aziátiku.

Iha fatin hanesan, Embaixadór Roberto Sarmento de Oliveira Soares hateten ohin hanesan onra boot tebes simu tomada de posse husi Prezidente Repúblika José Ramos-Horta, hanesan Embaixadór Estraordináriu no Plenipotensiáriu RDTL ba RI.

Nia afirma ho posse ne’e hanesan inísiu ba misaun ne’ebé sei halo iha RI. País rua ne’e iha relasaun bilaterál ida ne’ebé espesiál, tamba ida ne’e dunik mak konfiansa ne’ebé ohin hetan sei asegura ho didi’ak atu salva guarda interese nasionál liu husi hametin kooperasaun bilaterál entre país rua ne’e.

“Ha’u seidauk bele divulga sai bá ita-boot sira nia lala’ok no rezultadu bá oin oinsá, tamba ida-ne’e hanesan inísiu. Molok atu hala’o misaun lolos ha’u sei mai fali atu hetan orientasaun ka diretiva atu nune’e ha’u bele hala’o misaun ho di’ak no komporta kompromisu tomak atu bele salva guarda interese nasionál no interese mútua entre nasaun rua, liu-liu ba povu rua, la’ós de’it bá agora maibé bá tuir futuru tuir mai,” Roberto Sarmento de Oliveira Soares hateten.

Nia hatutan, Xefe Estadu husu atu hala’o servisu ne’e ho di’ak, liu-liu ba defende interese nasionál Timor-Leste nian, tuir konfiansa politika ne’ebé Prezidente Repúblika no Primeiru-Ministru (PM), Kay Rala Xanana Gusmão fó no liu-liu kumpre tuir Konstituisaun Repúblika no lei sira fó.

Jornalista: Vito Salvadór