Hatutan.com, (23 Jullu 2024), Díli- Ministru Justisa (MJ), Sérgio de Jesus Fernandes da Costa Hornai,  hateten Ministériu Justisa sei halo tuir prosesu no mekanizmu sira ne’ebé iha hodi hakle’an averiguasaun no buka verdade lolos hodi fó solusaun ba Instituisaun Polísia Sientífiku Investigasaun Kriminál (PCIC, sigla portugés).

Lee Mós: Ministru Sergio Hornai Halo Hela Avaliasaun bá Komportamentu Diretór Nasionál PCIC

Ministru Justisa, Sérgio de Jesus Fernandes da Costa Hornai. Foto/Elio dos Santos da Costa

“Ita boot sira hatene hanesan instituisaun konserteza rona problema sira ne’ebé mosu bá dala uluk tenke halo prosesu tuir mekanizmu sira ezisténsia, halo avereguasaun, buka verdade no fó solusaun bá iha problema ne’ebé karik iha indisu ruma,” Ministru Sérgio de Jesus Fernandes da Costa Hornai hateten bá jornalista sira iha Palásiu Prezidensiál, Tersa (23/07/2024).

Nia hatutan hanesan públiku sira akompaña didi’ak katak pesoa ne’ebé sujeita ba iha prosesu, oras ne’e mantein sujeita hela ba prosesu administrativu no mós prosesu balun ne’ebé nia tenke responsavel ka bá hatán perante autoridade kompetente nia oin.

Iha fatin hanesan Prokuradór Jerál Repúblika (PGR), Alfonso Lopes hateten, kona-ba Kazu ne’ebé mosu iha PCIC loke ona prosesu no parte administrativu disiplinár la’o ona kabe ba diretór ne’ebé tutela ba ho MJ.

Nia argumenta mós katak parte ida ne’e hafoin akontesimentu sira enkamina kedas ba PGR, no kazu ne’e seleridade ho esforsu Prokuradór titulár la’o ona no fulan tolu.

Jornalista : Vito Salvadór