Hatutan.com, (29 Outubru 2024), Díli- Membru Komisaun B Parlamentu Nasionál (PN),  Florentino Ximenes “Xinarai, fó sala bá membru FALINTIL-Forsa Defeza Timor Leste (F-FDTL) husi Unidade Polísia Militár (PM) ne’ebé simu orientasaun husi Xefe Estadu Maiór F-FDTL, Tenente-Jenerál Domingos Raul “Falur Rate Laek” hodi “hatama kanuru-tohar” ka  halo intervensaun militár iha prosesu kongresu estraordináriu Federasaun Futeból Timor-Leste (FFTL) iha Novo Turismo, Sábadu liubá.

Lee Mós: La Merese Militár Tama iha Kongresu Estraordináriu FFTL

Membru F-FDTL hosi Unidade Polísia Militár tama bá plena KOngresu Estraordináriu FFTL hodi obriga ho forsa hasia Aleixo Cobra hanesan prezidente Asosiasaun Futeból Dili Leste. Foto/Vito Salvadór

Membru Komisaun B-PN ne’ebé trata asuntu Negósiu Estranjeiru no Defeza Seguransa, Deputadu Florentino Ximenes “Xinarai” afirma loloos  F-FDTL labele tama to’o plenária kongresu FFTL nian hodi bá hasai fali membru plena kongresu nian nu’udár mós prezidente Asosiasaun Futebol Dili Leste, Aleixo Cobra.

Deputadu Xinarai  trite ho insidente iha kongresu estraordináriu FFTL tanba rona Tenente-Jenerál Falur Rate Laek orienta fali nian membru F-FDTL hodi hasai nia alin Aleixo Cobra ne’ebé tuir loos bele tuur hamutuk hodi ko’alia no buka solusaun la’ós uza forsa militár hodi hasai Aleixo Cobra hanesan fali ahu-na’in ida atu halo destruisaun boot ne’ebé fó ameasa bá estabilidade nasionál.

“Atuasaun forsa militár nian ne’e kualkér situasaun saida de’it, satan hanesan kongresu estraordináriu FFTL nian mak forsa tama iha ne’ebá tama to’o plenária laran  ne’e sala. Tuir loloos sira ko’alia didi’ak ba malu para kongresu ne’e bele la’o ho di’ak para iha futuru Futeból Timor-Leste bele ba oin,” Deputadu Florentino Ximenes Xinarai ba jornalista sira iha PN, Tersa (29/10/2024).

Nia haktuir  konstituisaun RDTL  garantia situasaun sira hanesan ne’e só Polisia Nasionál Timor-Leste  (PNTL) de’it mak bele halo seguransa. Membru F-FDTL iha ne’ebá ne’e parese bá seguransa pesoál nian bá Tenente-Jenerál Falur Rate Laek,  maibé la podia halo intervensaun tanba Tenente-Jenerál Falur Rate Laek bá partisipa hanesan prezidente internu FFTL la’ós ho títulu Xefe Estadu Maiór Jenerál Forsa Armada.

“Tuir loloos papél PNTL nian mak importante iha situasaun ida-ne’e, F-FDTL laiha duni, kuandu iha serimónia saida de’it, organizasaun hanesan FFTL ne’e bele lori karta bá PNTL hodi oinsá tau seguransa para kongresu ne’e la’o to’o nia rohan. Ne’e sala no F-FDTL nunka mais partisipa iha situasaun ida hanesan ne’e,” Deputadu Xinarai afirma tan.

Membru Bankada FRETILIN ne’e haktuir pesoál F-FDTL parese balu hola parte iha FFTL mais ne’e pesoál, tuir loloos tau sivíl mak bá la devia bá ho militár tanba militár laiha atu halo atuasaun iha eventu sira hanesan ne’e.

Iha fatin hanesan Prezidente komisaun B-PN Deputadu Domingos Augusto Deker nu’udár mós veteranu ida hateten nia parte seidauk entende  didi’ak insidente to’o forsa sira ba hasai Akeixo Cobra.

“Ha’u labele ko’alia buat ida orasida ha’u bele tama sala enkuantu hanesan komisaun  B-PNne’ebé mak trata asuntu no responsabiliza mós asuntu defeza seguransa ha’u presiza intera para ko’alia karik la bele sala,” Deputadu Domingos Augusto Deker hateten.

Jornalista Estajiária: Zita Menezes