Hatutan.com, (05 Novembru 2024), Díli-Polisia Nasionál Timor-Leste (PNTL) Munisípiu Ainaro, kaptura  ona suspeitu na’in-haat ne’ebé envolve iha kazu oho Paul Madeira Tilman (28) iha Suku Maulau, Postu Administrativu Maubisse, Munisípiu Ainaro.

Lee Mós: Suspeitu Na’in-6 Hatán iha Tribunál Hafoin Halo Atake Hasoru Tenente Koronél Laurentino ho Família iha Triloka

Kazu omesídiu ne’e akontese iha Sábadu (02/11/2024), iha kedas semiteiru laran Suku Maulau nian iha ámbitu sarani no família matebian sira ne’ebé lori ai-funan no sunu-lilin bá semitériu sira.

Informasaun ne’ebé Hatutan.com asesu hosi pesoál servisu informasaun  iha Kuartel Jerál PNTL, Caicoli, Díli, Tersa (05/11/2024), katak, kazu omesídiu iha Maulau ne’e iha suspeitu na’in-haat mak Polísia kaptura ona, no dadauk ne’e investigadór sira halo hela identifikasaun iha PNTL Ainaro.

Komandante Jerál PNTL, Komisáriu Polísia Henrique da Costa. Foto/Elio dos Santos da Costa.

Komandante jerál PNTL, Komisáriu jerál Polísia Henrique da Costa, informa, akontese sira ne’ebé akontese iha loron 02 Novembru, foin lalais, liu-liu iha Ainaro, mosu kazu tolu kedas. Ida iha área Suku Maulau, ida iha Suku Manelobas, no ida tán iha área Postu Administrativu Hato-Udo nian.

Kazu sira ne’e, parte PNTL Munisípiu Ainaro atende ona, depois, komandu PNTL  mós orienta komandu Unidade Espesial Polísia (UEP) halo mós movimentu bá iha área ne’ebá. Nune’e, medida polísia ninian mak kaptura ona autór sira hodi halo prosesu no aprezenta bá iha ministériu públiku.

Kronolójia ne’e, tanba ema sira ne’e mai ho problema pasadu nnian, tanba hadau malu rai no tanba mós sira dehan iha problema partikulár hanesan lia feto-sá no uma-mane nian.

Kazu Manelobas

Iha loron ne’ebé mak hanesan, 02 Novembru 2024, akontese mós kazu asalta malu iha área Suku Manelobas, tanba hadau malu rai. Kazu ne’e rezulta uma rua rahun, ema na’in-haa (4) kanek.

“Kazu ne’ebé akontese iha Suku Manelobas  tanba hadau malu rai. Polísia seidauk kaptura autor sira, maibe vítima sira hato’o ona keixa ba Polísia hodi buka tuir autor sira,” Komisáriu jerál Polísia Henrique da Costa informa.

Jornalista: Rogério Pereira Cárceres