Hatutan.com, (20 Dezembru 2024), Díli- Enkarregadu Negósiu India iha Timor-Leste, Arindam Banerjee, afirma India iha kompromisu apoiu dezenvolvimentu infraestrutura ba dijitalizasaun.

Lee Mós: Índia Hakarak Kapasita Rekursu Umanu TL

Enkarregadu Negósiu India iha Timor-Leste, Arindam Banerjee. Foto/Média GPR

“Ami diskute asuntu importante sira liga ho relasaun bilaterál no diplomátika entre India no Timor-Leste, no ami ko’alia mós kona-bá Prezidente Repúblika, José Ramos-Horta nia vizita ba  Bangladesh iha semana kotuk no prezidente Ramos-Horta mós haktuir kona-bá diskusaun oioin ne’ebé halo durante vizita ba Bangladesh, no ko’alia liu mós kona-bá planu vizita sira entre India no Timor-Leste ba tinan oin hodi haree oportunidade iha diskusaun sira seluk kona-bá projetu bilaterál sira, liu-liu ba iha infraestrutura no dijitalizasaun,” Arindam Banerjee hateten ba jornalista sira hafoin enkontru ho Prezidente Repúblika José Ramos-Horta iha Palásiu Prezidensiál, Sesta (20/12/2024).

Enkarregadu negósiu India ne’e haree hela  projetu prinsipál balun, liu-liu iha projetu ID dijitál, ne’ebé Timor-Leste iha hela prosesu dezenvolvimentu infraestrutura iha fulan sira mai ne’e, no iha tinan oin, India no Timor-Leste bele iha kooperasaun no serbisu hamutuk atu hadi’a dezenvolvimentu dijitalizasaun di’ak liután ba oin.

Kona-bá infraestrutura iha Timor-Leste, hahú hare mós kona-bá estudante medisina sira iha universidade atu iha médiku sira ne’ebé kualifikadu.

Iha sorumutuk ne’e mós Prezidente Repúblika José Ramos-Horta hato’o parabéns ba Primeiru-Ministru India no husu atu bele vizita Timor-Leste iha tinan oin.

India loke ona nia embaixada iha Timor-Leste dezde fulan-Setembru liubá no Timor-Leste mós loke ona embaixada iha India, sidade New Delhi iha fulan-Outubru liubá.

Jornalista: Vito Salvadór