Hatutan.com, (27 Dezembru 2024), Díli- Reuniaun Konsellu Superiór Defeza no Seguransa (KSDS), Sesta (27/12/2024), Prezidente Repúblika José Ramos-Horta kontínua husu ba Autoridade Defeza no Seguransa atu halo balansu ba situasaun seguransa iha territóriu nasionál hodi simu tinan foun 2025 ho pás no estabilidade.

Lee Mós: Durante Natál, PNTL Detein Joven 21

Portavós reuniaun Konsellu Superiór Defeza no Seguransa (KSDS), João Aparício ba jornalista sira iha Palásiu Prezidensiál, informa eenkontru Konsellu Superiór Defeza no Seguransa ko’alia kona-ba balansu seguransa tinan 2024.

Reuniaun Konsellu Superiór Defeza no Seguransa (KSDS), Sesta (27/12/2024). Foto/Média MNEK

“Atu avalia situasaun seguransa nasaun nian, ita hotu hatene katak iha tinan ida-ne’e maibé liu-liu iha fulan-Setembru vizita Sua Santidade Papa Francisco nian mai ita-nia rain la’o di’ak tebes. Ne’e-duni, iha sinál konfiansa, sinál serenidade,  sinál trankuilidade, signifika iha respeitu boot tebes entre ita Timoroan fiar na’in ne’ebé simu Sua Santidade Papa Francisco,” João Aparício hateten.

Nia hatutan pontu ida seluk ko’alia naturalmente kona-bá kontinua hametin kooperasaun entre entidade seguransa rai-laran ninian no departamentu estadu hotu-hotu ne’ebé kolabora hodi hametin orden públika iha parte ida, no iha parte ida seluk ba prevensaun, prevene konflitu ne’ebé bele mai iha tinan oin mai.

“Prezidente Repúblika José Ramos-Horta bolu Konsellu Superiór Defeza no Seguransa (KSDS) atu halo balansu ba seguransa tinan 2024 no hanesan lider, seguransa saida mak bele foti iha pasajen tama tinan foun,” Nia subliña.

Partisipa iha reuniaun Konsellu Superior Defeza no Seguransa ne’e mak Ministru Defeza Donaciano Costa Gomes “Pedro Klamar Fuik”, Ministru Interior Francisco Guterres, Ministru Justisa Sérgio de Jesus Fernandes da Costa Hornai, Ministru Negósiu Estranjeiru Bendito dos Santos Freitas, Xefe Estadu Maiór Jenerál F-FDTL, Tenente-Jenerál Domingos Raul Falur Rate Laek, Komandante Jerál PNTL, Superintendente-xefe Henrique da Costa,  Parlamentu Nasionál representa husi Vise Prezidente Parlamentu Nasionál Deputada Terezinha Viegas, Deputadu David Dias Ximenes Mandate, Diretór PCIC, Diretór SNI ho sira seluk tan.

Jornalista: Vito Salvadór