Hatutan.com, (24 Janeiru 2025), Díli—Ministériu Defeza (MD) liu-hosi Ministru Donaciano do Rosário Gomes, entrega arma militár bá Komandu FALINTIL-Forsa Defeza Timor-Leste (F-FDTL) atu uza bá nesesidade instituisaun nian.

Xefi Estadu Maiór Jenerál F-FDTL Tenente Jenerál Domingos Raul “Falur Rate Laek” simu arma hosi Ministériu Defeza, iha Kuartel Jenerál, Fatuhada, sesta (24/01/2025). Foto: Lázaro Quefi.

Tipu armamentu militár ne’ebé entrega mak hanesan metralladora M249, metralladora M60E6, no munisoens ho tipu bala real M4, bala real ho pita, bala real 7.62 x 51 MM, bala real ho pita 7.62xMM, bala pistola real glock 45, bala pistola real glock 23, bala simulada 5.56×45 no bala simulada ho pita 5.56×45 MM.

Lee Mós: Pedro Klamar Fuik Hakarak Dezenvolve F-FDTL Sai Forsa Armada Ne’ebé ho Orientasaun bá Pás

“Ita entrega armas ho tipu tolu M249 nia metralladór aliajeira atu kompleta orgánika estrutura kombate no mós M60 ho metralladór semi pezada ho nia funsaun atu defende ita-nia pozisaun defensiva ruma hanesan baze no bele mós destroi inimigu nia defensivu ruma depois ho pistola glock balun. Tanba ne’e armamentu hirak ne’e hola parte halo kompra iha tinan 2023 tuir lei programasaun militár no orsamentu mós mai hosi programasaun ne’e rasik,” Donaciano Costa Gomes hateten iha kuartél jenerál F-FDTL Fatuhada, sesta (25/01/2025).

Ministru hateten, F-FDTL ne’e sofre moras transformasaun ne’ebé la’ós fásil maibé iha prosesu ida konstrusaun Estadu haree bá ángulu hotu-hotu tanba ne’e Estadu presiza atu tau-matan.

Saida mak sosa ona iha ne’e, hanesan kilat ho arma sira seluk bá oin sei halo kompletamentu beibeik bá armamentu ne’ebé mak forsa sira presiza nune’e bele bem ekipadu, operasionál no rasionál hodi utiliza ekipamenetu ne’ebé mak Estadu atribui bá komprimentu misaun defeza nasaun ninia interese rasik.

Tanba ne’e, preokupasaun hotu-hotu labele atu realiza hotu kedan iha ohin, aban no bainrua maibé halo ho tempu no halo komforme tuir Estadu nia forsa saida mak Estadu tenta fahe tuir prioridade ne’ebé organizasaun sira iha hodi bele dezenvolve.

Iha fatin hanesan Xefi Estadu Maiór Jenerál F-FDTL Tenente Jenerál Domingos Raul “Falur Rate Laek” hateten, Ministériu Defeza agora hala’o daudauk ona ninia objetivu hosi órgaun sub-maternu sira ne’ebé mak depende bá Ministeriu Defeza.

Tanba ne’e, ho forsas armadas liu hosi kooperasaun tomak agora hala’o servisu hodi kumpri palavra de onra katak tama ona bá tempu atu moderniza no profesionaliza forsas armadas iha Timor-Leste.

“Ita fiar metin katak ita seidauk implementa ho pursentu ne’ebé bo’ot maibé ha’u senti ita iha ona dalan seguru ho pasu ne’ebé metin importante liu mak ita la’o neneik bá oin nafatin,” Tenente Jenerál Domingas Raul “Falur Rate Laek” dehan.

Falur Rate Laek hato’o agradesimentu bá Ministériu Defeza katak tenki aplika duni iha prátika sira hanesan ne’e.

Falur apela bá forsas armada hotu-hotu katak, Governu investe dadaun ona mai forsas armadas tanba ne’e husu ho prátika no servisu loron-loron nian ne’ebé hatene husu, hatene mós simu tanba ne’e sasan sira ne’ebé mak uza atu salva instituisaun no mós Estadu.

Jornalista Estajiáriu: Lázaro Pereira Quefi