Hatutan.com, (07 Fevereiru 2025), Díli– Ministra Solidaridade Sosiál no Inkluzaun (MSSI), Verónica das Dores, konfirma katak Governu ida-ne’e lidera hosi Primeiru-Ministru (PM), Kay Rala Xanana Gusmão seidauk hapara programa Bolsa da Mãe, maibé hapara de’it mak programa Bolsa da Mãe Jerasaun Foun.

Lee Mós: Ministra Verônica das Dores Husu Koordenadór Sosial Sira Labele Taka Telefone bá Povu

Ministra MSSI Verónica das Dores halop diskursu. Foto/Elio dos Santos da Costa

Governu liuhosi MSSI deside taka Bolsa da Mãe Jerasaun foun, tuir Ministra Solidariedade Sosiál no Inkluzaun (MSSI), Verónica das Dores, katak Bolsa da Mãe Jeraun Foun ne’e kustu boot tebes hodi fahe bá inan isin-rua sira la haree ba ida ne’ebé kbiit iha no laiha kbiit.

“MSSI taka Bolsa da Mãe Jerasaun foun ne’ebé eziste iha tinan 2022 ka 2023. Tanba  IX Governu tama mai haree bá nia kustu ne’ebé boot loos, haree katák kualkér feto sé de’it mak isin-rua simu hotu osan ida Bolsa da Mãe Jerasaun Foun,” Ministra Verónica das Dores haktuir ba jornalista sira, Sesta (07/02/2025).

Haree bá kustu ida boot tebes entaun MSSI haree katák labele, tenke halo estudu klaru ida molok atu simu osan ida-ne’e, tán ne’e mak IX Governu  taka Bolsa da Mãe Jerasaun Foun, maibé Bolsa da Mãe la taka.

 Ministra Verónica das Dores fundamenta,  Bolsa da Mãe la taka, kondisionál Bolsa da Mãe eziste iha tinan 2008, tanba programa ida-ne’e Brazil nian depois Governu Timor-Leste adopta tuir.

“Ita haree  família lubuk ida ne’ebé presiza apoiu duni atu nia oan bá eskola, família mak ida ne’ebé ha’u esplika fali para ita-boot sira komprende mak hanesan inan sira kbiit laiha no oan sira liu na’in-lima,” Ministra MSSI Verónica das Dores bá jornalista sira iha Edifisiu MSSI, Caicoli, Díli.

Ministra ne’e esplika  parte seluk mak  inan abandonadu ka inan faluk sira no aman faluk purezemplu, iha mós inan ne’ebé iha oan ida rua, maibé nia kabeen husik hela, entaun ida-ne’e enkaixa mós iha bolsa família no seluk fali mós inan kbiit laiha ka família vulneravél sira.

“Bolsa da Mãe orsamentu agora daudaun iha  IX Governu ne’e inan-kbiit laek ne’ebé oan sira  eskola iha eskola primaria kada fulan simu  $8.00, Eskola Pre-Sekundria $9.00 no Sekundária $10 no $5.00 bá ema ne’ebé mak difisénsia,” Ministra Verónica das Dores informa.

Membru Governu ne’e hateten bá familia vulneravél ne’ebé kuandu  oan la eskola sei labele simu osan, hirak ne’ebé mak oan ladún bá eskola ladún ativu valór ladi’ak ne’e MSSI  sei ko’a osan.

Jornalista Estajiária: Zita Menezes