Hatutan.com, (11 Fevereiru 2025), Díli – Prezensa Konsellu Polísia Komunitáriu (KPK) atu hametin relasaun entre Polísia Nasionál Timor-Leste ho komunidade ka povu ein-jerál.

Lee Mós: PNTL Identifika Suspeitu Na’in-rua Hakanek Membru KPK Iha Bairru-Pité

PNTL serbisu hamutuk ho Embaixada Nova Zelándia iha Timor-Leste fasilita formasaun ba Konsellu Polisiamentu Komunitáriu (KPK) husi Munisípiu 13 durante loron tolu iha Salaun Akademia PNTL Comoro Díli, Tersa (11/02/2025), Foto/Elio dos Santos da Costa.

Ho filozofia ne’e,  Tersa (11/02/2025), Komandu Jerál PNTL fasilita formasaun loron tolu, hahú hosi loron 11 to’o loron 13 fulan-Fevereiru 2025, ba xefe seksaun polisiamentu komunitária sira hodi armoniza relasaun iha baze.

Formasaun ne’ebé hala’o iha Akademia PNTL iha Comoro, Díli, partisipa  hosi xefe seksaun polisiamentu komunitáriu  munisípiu 13 inklui Rejiaun Administrativu Espesiál Oé-Cusse Ambeno (RAEOA).

Materia formasaun ne’e haree kona-bá manual konsellu polisiamentu komunitáriu no matéria balu oinsá entende hodi domina liu kona-bá manual KPK sira depois xefe seksaun polisiamentu komunitáriu sira idak-idak fila fali ba sira nia munisípiu  halo fali formasaun ba membru Ofisial Polísia Suku (OPS) sira liuliu ba KPK sira.

“Ita lakohi sira la iha koñesimentu sufisiente depois kazu kriminál sira tenta atu rezolve tuir fali dalan família no seluk tan.  Ita hatene katak kazu violénsia  doméstika ne’e nia númeru sa’e maibé liu hosi sira bele kontinua enkontru ho komunidade sira esplika buat krime sira ne’e atu komunidade sira bele hatene no komprende,” Komandante Jerál PNTL  Komisáriu Jerál Hendrique da Costa hateten ba jornalista sira.

Nia  husu ba xefe seksaun polisiamentu komunitáriu sira idak-idak  ba hala’o fali formasaun ne’e iha suku sira maske KPK iha suku balu seidauk estabelese. Ida ne’e remata tiha depois organiza bele estabelese iha suku sira hotu.

” Ita nia difikuldade mak Polísia ida ne’ebe mak koloka sai hanesan OPS ne’e nia hala’o funsaun barak balu dalaruma hala’o funsaun Servisu Administrasaun hotu, OPS hotu, investigasaun hotu, tránzitu hotu, patrolia  ne’e hotu tanba ne’e planu guvernu ba rekrutamentu Polísia iha tinan ne’e se koloka ba munisípiu sira hotu atu idak-idak hala’o ninia funsaun hodi labele dupla funsaun,” Henrique da Costa hateten.

Iha fatin hanesan Diretór Diresaun Polisiamentu Komunitáriu,  Superintendente Polísia Ismael da Costa Babo  hateten programa formasaun ne’e objetivu atu hasae koñesimentu xefe seksaun polisiamentu komunitáriu hodi haburas no  hametin relasaun PNTL ho komunidade iha Timor-Leste.

“Polisia komunitáriu hala’o knar ne’ebé krusiál hodi mantén pás, armonia no seguransa ba hotu-hotu iha Timor-Leste,” Superintendente Polísia Ismael da Costa Babo informa.

Iha fatin hanesan Embaxadora Nova Zelándia mai Timor-Leste, Helen Tunnah Hateten kontente tebes atu suporta governu Timor – Leste liuliu PNTL tanba ne’e Nova Zelándia nia apoiu ba PNTL la’o kleur ona.

Nia dehan, programa atu apoiu Polísia Komunitáriu mak hanesan sosiedade ida ne’ebé seguru hodi hametin konfiansa entre Polísia ho komunidade tanba ne’e ho formasaun ida ne’e hanesan pasu esensiál ida hodi hari nafatin pás iha sosiedade  nia-leet iha territóriu Timor-Leste.

Jornalista Estajiáriu : Lazaro Pereira Quefi