Hatutan.com, (25 Marsu 2025), Díli– Ministériu Asuntu Kombatente no  Libertasaun Nasionál (MACLN, sigla portugés)  hamutuk ho Komisaun Kombatente Libertasaun Nasionál (CCLN) fó tan tempu loron-30 ba veteranu sira rejistu 2009 ho 2003 atu submete  reklamasaun.

Lee Mós: PPN Husu Komisaun Independente MACLN-CCLN Halo Fiskalizasaun ba Lista Veteranu Rejistu 2009

Komunidade Aileu hakbesik ba haree lista naran veteranu nian ne’ebé taka iha kuadru avizu sira. Foto/Dok.Tome da Silva

“Kona-bá dadus reklamasaun nia to’o agora sei tama nafatin. Atu hatene loloos dadus ne’e, sira ne’ebé mak servisu iha baze dadus nian mak bele hatene. Maibé, foin daudaun, ami reuniaun katák fó tán loron-30 para veteranu sira atu halo reklamasaun no reklamasaun ida-ne’e la’ós bá de’it lista 2009 maibé lista 2003 mós atu haree dala ida no resolve dala ida de’it,” Prezidente CCLN, Vidal de Jesus “Riak Leman” haktuir ba Hatutan.com iha nia edifísiu MACLN, Tersa (25/03/2025).

Loron-30 ne’e sura husi loron 17 fulan-Marsu to’o  loron 18 fulan-Abríl atu reklamasaun hotu submete ona.

“Tanbasá mak ita haree lista 2003 no 2009 dala ida tanba servisu barak ne’ebé atu halo dala ida de’it,  tanba atu rezolve problema hirak ne’e hotu tenke lori tempu,” Riak Leman hateten.

Nia hatutan iha reklamasaun primeiru faze veteranu sira halo reklamasaun barak liu mak mai husi Munisipiu Ermera.

Antes ne’e, liuhosi konferénsia imprensa iha loron 17 fulan-Marsu ne’e, Ministru MAKLAN Gil da Costa Monteiro “Oan-Soru” informa katák totál dadus reklamasaun no kontestasaun ne’ebé sira simu ona iha faze primeiru hamutuk (35,617). Dadus hirak ne’e CCLN simu hosi reklamante sira iha munisipiu 13 no RAEOA durante fulan-tolu (15 Janeiru to’o 14 Marsu 2025).

Maske prazu bá submisaun reklamasaun ka kontestasaun nian remata ona, maibé, iha munisípiu balu seidauk konklui sira nian dokumentu reklamasaun nian, tanba ema ne’ebé atu sai testemuña bá sira nian deklarasaun, seidauk marka asinatura. Tanba ida ne’e maka, iha 17 fulan-Marsu 2025, foin lalais ne’e, liuhosi reuniaun konsellu konsultivu entre MAKLN ho CCLN, deside hodi halo estensaun prazu fulan-ida tan atu fó tempu bá reklamante sira hodi kompleta ninian dokumentu.

Jornalista Estajiária: Zita Menezes