Hatutan.com, (28 Marsu 2025), Díli- Esperança Timor Oan (ETO) dezmente informasaun falsu ne’ebé sirkula iha mídia sosiál Facebook kona-bá alegasaun irregularidade iha funsionamentu ka fornesimentu postu kombustivel Mandarin iha Dili.

Komunikadu ba Imprensa ne’ebé Hatutan.com asesu husi portal ofisiál ETO, Sesta (28/05/2025) hateten ETO ninia atividade hotu-hotu hala’o ho apropriadu, kumpre ho rigorozu rekizitu legál sira no tuir supervizaun kontínua husi Divizaun Downstream husi Autoridade Nasionál Petróleu, Institutu Públiku (ANP, I.P).

Tékniku sira husi ANP,I.P halo inspesaun rotina ba estasaun bomba kombustivel ETO Mandarin-Díli. Foto/Espesiál

ANP I.P entidade ida ne’ebé rekoñesidu iha nivel nasionál no internasionál tanba ninia regulamentasaun ne’ebé kapás tebes. Ho nune’e, ETO konsidera alegasaun sira ne’ebé mak empreza deskreve hanesan difamatóriu no laiha baze, foin lailais ne’e hetan relevu iha publikasaun online sira ne’ebé kestiona integridade hosi fornesimentu iha postu kombustivel Mandarin,

Tuir publikasaun sira, ETO halo reasaun kedas, hodi halo investigasaun interna ida ne’ebé detallada hodi klarifika kazu ne`e. Postu ne’e, ne’ebé sosa iha tinan balun liubá no loke fali iha loron 15 fulan-Novembru  2023 hafoin modernizasaun boot ida, hetan análize kle’an ida ne’ebé inklui revizaun ba imajen sira ne’ebé kaptura hosi kámara vijilánsia nian (CCTV), verifikasaun manuál ba volume sira kombustivel nian ne’ebé sai hosi bomba ne’ebé refere no konsulta resibu sira ne’ebé fó sai hosi sistema eletróniku.

Dokumentu sira-ne’e, ne’ebé rejista movimentu kartaun nian hosi funsionáriu ne’ebé envolve iha servisu, konfirma katak valór sira tama no sai kombustivel nian aliñadu ho loos, la ho diskrepánsia ruma.

Konkluzaun klaru: laiha irregularidade iha fornesimentu, no volume ne’ebé kobra ba kliente korresponde loos ho ida ne’ebé fornese. ETO atribui insidente ne’e ba posibilidade dezentendimentu ida hosi parte kliente ida nian, ne’ebé hetan ona kontaktu diretamente no simu esplikasaun ho di’ak. Kompañia lamenta katak dezentendimentu ida-ne’e aumenta iha mídia sosiál, hodi kria narrativa falsu ida ne’ebé estraga nia reputasaun.

ETO destaka sofistikasaun ekipamentu ne’ebé instala iha postu Mandarin, ne’ebé tuir padraun kualidade internasionál no taka metin (selajen) no kalibra husi ANP.

Prosesu selajen ida-ne’e, ne’ebé mak ezije tuir lei, téknikamente prevene dispensadór sira atu fornese kombustivel menus liu duké indika, hodi garante konfiabilidade servisu nian.

Aleinde ne’e, empreza subliña katak ekipamentu sira hetan inspesaun periódikamente hosi autoridade sira, no katak inspesaun ida foin lailais ne’e hosi postu, ne’ebé nia rezultadu sira fahe publikamente hosi ETO iha nia rede sosiál sira, la identifika problema ruma.” Hatutan.com sita komunikadu.

Tékniku husi ANP,I.P halo inspesaun rotina ba estasaun bomba kombustivel ETO Mandarin-Díli. Foto/Espesiál

Ho istória tinan 25, ETO nu’udár pioneiru ida iha setór petróleu no gás entre empreza sira ne’ebé totalmente na’in ba timoroan sira, nu’udar úniku ne’ebé hala’o operasaun iha segmentu hotu-hotu kadeia valór indústria petrolífera nian – importasaun, transporte, armazenamentu no komersializasaun iha estasaun servisu sira iha nasaun laran tomak. Postu Mandarin, ho ninia instalasaun modernu no kombustivel ho kualidade internasionál, reflete kompromisu empreza nian ba inovasaun no satisfasaun kliente nian. ETO agora daudaun emprega ema liu 216 no hala’o operasaun ho lema “Moving Energy”, hodi buka beibeik atu hadi’a nia servisu sira. Kompañia deklara ninia disponibilidade permanente hodi klarifika dúvida ruma hosi ninia kliente sira, hodi buka atu reforsa beibeik prosedimentu internu sira hodi hadi’a kualidade servisu nian no ami nia atendimentu ba kliente. Ami hakarak hadi’ak no serbí di’ak liután.

Haree ba publikasaun sira iha mídia sosiál Facebook, ETO husu ba konsumidór sira atu adota prátika simples sira hodi evita dezentendimentu sira iha futuru: verifika prezensa hosi selu ANP nian iha ekipamentu, ne’ebé prova ninia kalibrasaun no integridade, no konfirma volume kombustível nian iha vizór bomba nian, envezde depende ba veíkulu nia sasukat kombustível nian, ne’ebé la iha serteza, ne’ebé aprezenta grau inserteza aas ida, Kompañia alerta katak tipu indikadór ida- ne’e, ne’ebé baibain iha automóvel sira, la serve hanesan referénsia ida ne’ebé konfiável hodi avalia fornesimentu, la hanesan ho ekipamentu sira ne’ebé inspesiona no taka metin hosi ANP.

ETO konsidera akuzasaun sira hanesan atake ba nia naran di’ak no kredibilidade ne’ebé nia harii ona ho povu timoroan no kliente sira ne’ebé uza nia servisu loroloron. Tanba ne’e, no karik konsidera nesesáriu, rezerva direitu atu rekorre ba tribunál sira hodi proteje faktu sira-nia verasidade no ninia reputasaun, ne’ebé konsolida durante tinan 25 nia laran tuir supervizaun husi Governu Konstitusionál sia ho konfigurasaun oioin. Empreza kritika utilizasaun hosi mídia sosiál sira hanesan meiu ida hodi rezolve disputa sira, prátika ida ne’ebé, tuir ETO hanesan komún iha Timor-Leste maibé dala-barak rezulta iha manipulasaun, keixa sira ne’ebé laiha fundamentu no asaun ilegál sira hosi parte datoluk sira.

Ba situasaun sira iha futuru, ETO rekomenda atu kliente sira ho pergunta ka keixa sira kontaktu diretamente diresaun postu sira nian ka rekorre ba ANP liuhosi mekanizmu legál sira ne’ebé prevee ona, envezde halo publikasaun sira online.Se rezolusaun amigável ida la posivel, empreza enkoraja atu uza kanál ofisiál sira reguladór nian.

 Jestaun ETO hein katak klarifikasaun ida-ne’e sei halakon dúvida sira ne’ebé hamosu hosi kazu Mandarin no hametin konfiansa hosi nia kliente sira, hodi repete nia kompromisu ba kualidade, transparénsia no kumprimentu loloos ba lei.

Jornalista : Elio dos Santos