Hatuan.com, (03 Abríl 2025), Díli- Primeiru Ministru (PM), Kay Rala Xanana Gusmão, hateten Governu Timor-Leste sei apoiu donativu ruma ba nasaun sira ne’ebé afeta ba dezastre naturál  (rai-nakdoko) iha Myanmar ho Tailándia liuhosi The Association of Southeast Asian Nations (ASEAN).

Lee Mós: Rai-Nakdoko Myanmar-Tailándia Rezulta Ema Lakon Vida Liu 1.600

Primeiru-Ministru, Kay Rala Xanana Gusmão. Foto/Tome da Silva

“Reuniaun Konsellu Ministru  nian, Kuarta horiseik, deside halo rezolusaun ida atu haruka netik donativu ruma ba hamutuk ho ASEAN,”  Primeiru Ministru (PM), Kay Rala Xanana Gusmão hateten ba Jornalista sira hafoin enkontru semanál ho Prezidente Repúblika (PR), José Ramos-Horta iha Palásiu Prezidensiál, Díli, Kinta (03/04/2025).

Xanana Gusmão informa, husi Ministru Negósiu Etranjeiru informa  katak Tailándia dehan sira iha ne’ebá terus liu no Tailándia mós balu fó hela ajuda, ne’e maka hanesan Tailándia nian karik ne’e ASEAN nian bele fó ajuda sira ne’ebé terus liu ne’e.

Númeru ema mate tanba rai-nakdoko maka’ás ne’ebé akontese iha Myanmar no Tailándia liu ona 1.600.

Sita hosi anúnsiu Governu militár Myanmar nian iha televizaun estatál balun, katak bainhira ekipa protesaun sivíl sira ke’e edifísiu sira ne’ebé monu nia rahun hetan daudaun ona vítima na’in-1.644 maka mate no liu na’in-3.400 hetan kanek, ho na’in-139 sei lakon hafoin rai-nakdoko ho magnitude 7,7.

Mandalay hetan rai-nakdoko maka’as. Sidade ne’e hanesan sidade boot daruak iha Myanmar no besik ba episentru rai-nakdoko nian.

“Kalan ida ne’ebé la konfortavel tebes ba ema barak. Sira hili atu toba iha li’ur. Ami haree sira iha parke sira tau kolxaun sira la’ós iha sira-nia uma laran,” Tony Cheng, husi média Al Jazeera fó sai situasaun hosi kapitál Naypyidaw.

“Iha nafatin réplika sira, balun ne’ebé ami sente ohin dadeer. Ladún boot, maibé natoon hodi halo ema sira sente ladún di’ak hodi fila fali ba edifísiu sira ne’ebé harii ona,” nia hatutan.

Sita husi Gabinete Nasoins Unidas  (ONU) nian ba Koordenasaun Asuntu Umanitáriu sira (OCHA) iha Sábadu liubá hateten, rai-nakdoko estraga infraestrutura krítiku sira, inklui ponte sira no estrada boot sira, hodi halo susar ba operasaun umanitária sira atu asesu ba área sira ne’ebé presiza,

Estragu ba Estrada Expresa Yangon-Nay Pyi Taw-Mandalay interrompe  servisu sira no distorsaun iha superfísie obriga autokarru sira atu suspende operasaun.

Anúnsiu balun ne’ebé fó sai iha Sábadu kalan hatete katak nia alarma forsa sira Defeza Populár nian (PDF) sei serbisu hamutuk ho Nasoins Unidas no ho organizasaun la’ós governamentál sira hodi garante seguransa, transporte no estabelesimentu kampu refujiadu  no médiku temporáriu sira  iha zona sira ne’ebé nia kontrola.

Iha kapitál Tailandeza-Bangkok, ne’ebé dook kilómetru 1.000 hosi episentru iha Myanmar, konfirma ona ema na’in-sanulu resin mate tan.

Rai-nakdoko ida ne’ebé maka’ás ho magnitude 7,7 akontese iha norueste sidade Sagaing nian, iha sentru Myanmar nian, iha Sesta loraik, tuir minutu balun liutiha ho réplika ida ho magnitude 6,7.

Rai-nakdoko ne’e estraga edifísiu sira, harahun ponte sira no estrada sira ne’ebé taka iha Myanmar tomak, no tanba komunikasaun ne’ebé ladi’ak iha área remota sira, ema barak fiar katak eskala loloos hosi dezastre ne’e seidauk fó sai.

 Jornalista : Tome da Silva