Hatutan.com, (31 Marsu 2025), Díli–Númeru ema mate tanba rai-nakdoko maka’ás ne’ebé akontese iha Myanmar no Tailándia liu ona 1.600.

Lee Mós: Timor-Leste Manifesta Solidariedade ho Povu Tailándia-Myanmar Ne’ebé Sofre Rai-Nakdoko

Edifísiu sira ne’ebé hetan estragu tanba rai-nakdoko iha Mandalay, Myanmar. Foto/Xinhua

Sita hosi anúnsiu Governu militár Myanmar nian iha televizaun estatál balun, katak bainhira ekipa protesaun sivíl sira ke’e edifísiu sira ne’ebé monu nia rahun hetan daudaun ona vítima na’in-1.644 maka mate no liu na’in-3.400 hetan kanek, ho na’in-139 sei lakon hafoin rai-nakdoko ho magnitude 7,7.

Mandalay hetan rai-nakdoko maka’as. Sidade ne’e hanesan sidade boot daruak iha Myanmar no besik ba episentru rai-nakdoko nian.

“Kalan ida ne’ebé la konfortavel tebes ba ema barak. Sira hili atu toba iha li’ur. Ami haree sira iha parke sira tau kolxaun sira la’ós iha sira-nia uma laran,” Tony Cheng, husi média Al Jazeera fó sai situasaun hosi kapitál Naypyidaw.

“Iha nafatin réplika sira, balun ne’ebé ami sente ohin dadeer. Ladún boot, maibé natoon hodi halo ema sira sente ladún di’ak hodi fila fali ba edifísiu sira ne’ebé harii ona,” nia hatutan.

Operasaun umanitária sira iha Myanmar hetan difikuldade maka’as tanba estrada sira no infraestrutura sira ne’ebé hetan estragu.

Sita husi Gabinete Nasoins Unidas  (ONU) nian ba Koordenasaun Asuntu Umanitáriu sira (OCHA) iha Sábadu liubá hateten, rai-nakdoko estraga infraestrutura krítiku sira, inklui ponte sira no estrada boot sira, hodi halo susar ba operasaun umanitária sira atu asesu ba área sira ne’ebé presiza,

Estragu ba Estrada Expresa Yangon-Nay Pyi Taw-Mandalay interrompe  servisu sira no distorsaun iha superfísie obriga autokarru sira atu suspende operasaun.

“Infraestrutura sira hanesan estrada sira, ponte sira no edifísiu sira afetadu ona, hodi hamosu vítima sira no kanek sira entre ema sivíl sira. Oras ne’e daudaun hala’o hela operasaun sira buka salva vítima sira  iha zona sira ne’ebé afetadu,” militár Myanmar hateten.

Atu fasilita esforsu tulun ba rai-nakdoko, Governasaun Sombra Unidade Nasionál ne’ebé koordena luta povu nian hasoru militár ne’ebé iha podér deklara estadu emerjénsia parsiál durante semana rua hahú iha loron-Domingu iha zona sira ne’ebé afetadu hosi rai-nakdoko.

Anúnsiu balun ne’ebé fó sai iha Sábadu kalan hatete katak nia alarma forsa sira Defeza Populár nian (PDF) sei serbisu hamutuk ho Nasoins Unidas no ho organizasaun la’ós governamentál sira hodi garante seguransa, transporte no estabelesimentu kampu refujiadu  no médiku temporáriu sira  iha zona sira ne’ebé nia kontrola.

Iha kapitál Tailandeza-Bangkok, ne’ebé dook kilómetru 1.000 hosi episentru iha Myanmar, konfirma ona ema na’in-sanulu resin mate tan.

Rai-nakdoko ida ne’ebé maka’ás ho magnitude 7,7 akontese iha norueste sidade Sagaing nian, iha sentru Myanmar nian, iha Sesta loraik, tuir minutu balun liutiha ho réplika ida ho magnitude 6,7.

Rai-nakdoko ne’e estraga edifísiu sira, harahun ponte sira no estrada sira ne’ebé taka iha Myanmar tomak, no tanba komunikasaun ne’ebé ladi’ak iha área remota sira, ema barak fiar katak eskala loloos hosi dezastre ne’e seidauk fó sai.

Harry Roberts, voluntáriu ida hosi organizasaun karidade internasionál ba dezastre Shelterbox, hatete katak situasaun iha Myanmar iha posibilidade atu sai “komplikadu tebes” no “grave tebes” tanba Governu laiha apelu sira ba ajuda internasionál.

Ekipa protesaun sivíl sira iha Bangkok serbisu to’o kalan hodi buka traballadór sira ne’ebé maka dadur bainhira arranha-céu ida ho andár 30 ne’ebé maka sei konstrui hela monu.

Edifísiu ne’e sai hanesan rai-rahun no metál ne’ebé nakfera iha segundu balun nia laran tanba forsa nakdoko nian.

Fontes: SINDONEWS