Hatutan.com, (03 Abríl 2025), Díli– Ministru Justisa Sergio Hornai sei orienta dirijente sira liuliu Diretór Jerál Notariadu atu solusiona problema Blanku Billete Identidade (BI) ne’ebé nafatin sai preokupasaun públiku.

Lee Mós: Governu Nafatin Fó Prioridade Solusiona Problema Kaderneta Pasaporte no Blanku BI

Ministru Justisa, Sergio Hornai. Foto/Zita Menezes

“Blanku BI hanesan ha’u hateten beibeik ona katák sé ohin hotu aban tenke esforsu para hadi’a, maibé dalaruma iha prazu sira ne’e akontese, hanesan ha’u hateten bei-beik hakarak ka lakohi,  ita buka esforsu para kestaun administrativa laiha interrupsaun, bele akontese blanku laiha tanba akizisaun demora,” Ministru Justisa Sergio Hornai bá jornalista sira hafoin halo audiénsia ho Komisaun A-PN, Kinta (03/04/2025).

Membru Governu afirma parte seluk karik falla uitoan iha jestaun, presiza mellora jestaun di’ak, laiha razaun atu impede  providénsia blanku sira ne’e bá iha dokumentu ofisiál hodi atende sidadaun sira.

“Kestaun ne’e bolu atensaun liután bá ha’u atu bele haree no orienta bá ha’u nian dirijente sira liuliu bá Diretór Jerál sira ne’ebé servisu tutela atu bele atentu liu, mais ha’u fiar katák sira hotu-hotu la fó espasu ida para atu bele iha interrupsaun bá iha prestasaun servisu bá komunidade liuliu bá iha sidadaun sira. Dalaruma iha interrupsaun husi kestaun tékniku,” Ministru  Sergio Hornai hateten.

Jornalista Estajiária: Zita Menezes