Hatuta.com, ( 03 Maiu 2025), Díli– Eis-Presidente Repúblika nu’udár mós eis-Primeiru Ministru, Taur Matan Ruak, konsidera, índise liberdade imprensa mundiál nian bá tinan 2025 monu iha ukun IX Governu nian.

Lee Mós:  Intervensaun SEKOMS Ba RTTL ho Tatoli Kontribui Hamonu Índise Liberdade Imprensa Timor-Leste

Eis-Primeiru-Ministru (PM), Taur Matan Ruak. Foto/Dok.Elio dos Santos da Costa

Taur Matan Ruak haree ida-ne’e hatudu Timor nia Liberdade Imprensa iha prekupante nia laran, triste ho situasaun ida ne’e.

Levantamentu  Reporters Without Borders (RSF) nian ba liberdade imprensa mundiál 2025 ne’ebé publika iha loron 03 fulan-Maiu 2025,   hatudu  Timor-Leste nia índise liberdade imprensa tuun husi númeru 20 ba númeru 39 ho pontu 71,79 hosi total nasaun 180.

“Iha VIII Governu Konstitusionál ne’ebé ha’u lidera, ita fó liberdade bá imprensa sira hala’o sira-nia kna’ar ho livremente sem interevensaun ruma iha sira-nia redasaun, ita husu mak sira nia responsabilidade oinsá hato’o notísia ho loloos, imparsial, indepdente, tuir faktus no kode étika Jornalista sira- nian, tanba Jornalista nu’udar pilar importante ida bá ita-nia demokrásia,” Taur Matan Ruak, hateten lia hirak ne’e iha komunikadu ba imprensa ne’ebé divulga Pajina Facebook offisial Eis Primeiro Ministru ne’ebé  Hatutan.com asessu.

Maske índise liberdade imprensa Timor-Leste monu maibé hanesan líder, hakarak apela nafatin bá Jornalista sira,  hato’o nafatin lia-loos no lian hosi povu kbiit-laek sira nian, embora eis Taur Matan Ruak hatene jornalista sira agora iha presaun nia laran hosi ukun nain sira.

Nia enkoraja nafatin Jornalista  sira foti nafatin problema sosial, ekónomia ne’ebé  povu enfrenta  iha ukun ida-ne’e hanesan problema eviksaun forsada sem kria uluk kondisaun, probelma nesesidade baziku, problema saúde, problema edukasaun no seluk tan.

Iha situasaun sira hanesan ne’e, tuir Taur Matan Ruak, jornalista sira-nia papel importante tebes fó kontribuisaun oinsá tulun  populasaun sira iha divulgasaun informasaun ne’ebe loos, justu, kredivel no mais edukativu atu ita-nia ukun na’in sira rona no tau matan sira.

Iha biban  ne’e, Taur Matan Ruak,  hato’o votus felisitasaun bá Jornalista sira hotu iha mundu tomak no partikularmente iha Timor-Leste ne’ebé selebra “LORON MUNDIAL LIBERDADE IMPRENSA NIAN”.

Eis Primeiru Ministru ne’e dehan, loron 03 fulan-Maiu, kada tinan, nu’udar loron espesiál ida bá jornalista sira, loron ne’ebé Nasoins Unidas adopta hanesan Loron Mundiál Liberdade Imprensa nian hodi fó hanoin bá nasaun sira hotu iha mundu tomak atu respeita no valoriza Liberdade Imprensa nian.

“Hakarak hatao’o votus felisitasaun ba Jornalista sira iha mundu tomak no espesialmente ba ba ha’u-nia oan jornalista timoroan sira hotu bá imi-nia loron espesiál ohin.” Eis Gerileiru ne’e hateten

Ikus liu,  Taur Matan Ruak la haluha agradese bá jornalista hotu nia kontribuisaun durante ne’e hato’o ona informasaun ba públiku sira, maské jornalista hasoru difikuldades oioin iha terenu, maibé jornalista nafatin iha vontade, badinas no profisionalizmu.

“Bá ida ne’e, hakuak boot bá imi hotu no dala ida tan Parabens” Taur Matan Ruak hateten.

Jornalista: Elio dos Santos da Costa