Hatutan.com, (11 Juñu 2025), Díli– Eletrisidade Timor-Leste, Empreza Públika (EDTL,E.P) eziste estrutura ne’ebé bele konsidera la’ós ki’ik. Daudaun ne’e,  EDTL,E,.P iha Sekretáriu Estadu ida, prezidente na’in-rua; ho mós komisáriu na’in-rua.

Lee Mós: Eletrisidade Mate-Lakan, Membru PN Sira Husu Prezidenti Komisaun Ezekutivu EDTL,E.P Rezigna Aan

Edífisiu EDTL,E.P iha Caicoli, Díli. Foto/Dok.

Kuadru másimu EDTL,E.P ne’e la sura ho kargu xefia sira, hanesan diretór,  xefe departamentu ho seluk-seluk tan.  Sekretáriu Estadu Eletrisidade Santos Noronha,  Prezidente Ezekutivu EDTL,E.P, Paulo da Silva, Prezidente Konsellu Administrasaun Marito Ferreira, Komisáriu Servisu Korporativa Julio de Jesus Gonçalves no Komisáriu Servisu Tékniku Roberto Manuel Marçal.

Kargu másimu sira iha EDTL,E.P boot nune’e, maibé espetativa povu nian atu garante eletrisidade labele mate-lakan seidauk iha solusaun. Nune’e, kada loron, liu-liu iha Sábadu ho Domingu, fenomena ahi mate permanente ka eletrisidade piska-piska kontinua eziste no seidauk iha solusaun  final.   

EDTL,E.P mós tutela ba Ministériu  Obras Públiku (MOP), nune’e Ministru  Samuel Marçal, klarifika katak EDTL,E.P mezmu  eziste kargu  prezidente rua, maibé ida-idak ho nia funsaun.

Konsellu Ministru iha  nia reuniaun   iha loron 25 fulan-Setembru no loron 02 fulan-Outubru,  tinan 2024, aprova ona rezolusaun Governu nian hodi nomeia Marito Ferreira  nu’udar Presidente Konsellu  Administrasaun  EDTL,EP, mezmu EDTL,E.P rasik mós eziste nanis prezidente Ezekutivu  ne’ebé asume husi  Paulo da Silva.

“Ha’u sente hanesan prezidente rua,  ida-idak ho  nia funsaun. Agora ne’e la’ós iha EDTL,E.P  maka iha prezidente, partidu mós  Prezidente barak, bar-barak loos, prezidente EDTL,E.P maka rua de’it haree bá nasionál, ONG mós prezidente barak, empreza sira mós prezidente bara,k Prezidente munisipál mós barak, mais  ida-idak ho nia servisu,”  Ministru Samuel Marçal argumenta hodi responde  Hatutan.com hafoin partisipa reuniaun Konsellu Ministru iha Palásiu Governu, Kuarta (11/06/2025) .

Kona-bá  kuadru legál sira  hodi hamosu kompozisaun estrutura EDTL,E.P ne’ebé eziste prezidente rua, sekretáriu estadu ida no komisáriu rua, Ministru Samuel Marçal hateten se la iha kuadru legal maka estutura sira-ne’e la eziste.

Kona-bá kompeténsia Sekretáriu Estadu Eletrisidade nian ne’ebé Ministru Obras Públiku foti hotu, Samuel Marçal deklara katak durante ne’e Sekretáriu Estadu Eletrisidade servisu saida nia la hatene.

“Ida ne’e ha’u la hatene, ne’e  bá husu bá  nia bá husu bá Sekretáriu Estadu ne’e,”  Ministru Samuel Marçal afirma.

Jornalista: Marcelino Tomae