Hatutan.com, (11 Jullu 2025), Díli-Polísia Nasionál Timor-Leste (PNTL), Sesta (11/07/2025),  asegura no halo identifikasaun ba sidadaun estranjeiru balu tanba halo agresaun fíziku hasoru membru PNTL ida husi Unidade Tránzitu.

Lee Mós: PNTL Asegura Suspeitu Estraga Ai-oan iha Jardín Ai-mutin

Ajente Xefe Polisia Anacleto Piedade halo keixa iha Eskuadra Polísia Dom Aleixo, tanba hetan agresaun fiziku hosi ema estranjeiru. Foto/Juvinal Cabral dos Santos

Kronolojia husi parte Polísia nian katak sidadaun estranjeiru ne’e tebes no rasta  ajente xefe polisia Anacleto Piedade bainhira ajente ne’e hapara sidadaun estranjeiru ne’e hodi fó hatene la bele kondús transporte simu ho telefone ka ko’alia telefónika.  

“Foin daudauk ita nia membru husi tránzitu hala’o sira nia servisu iha Ponte Comoro nian, depois sidadaun estranjeiru balu ne’ebé mak liubá fatin ne’ebá tanba telefone  entaun membru  polísia tránzitu hapara fó avizu kuandu kondús hela transporte labele telefone, maibé sidadaun estranjeiru ne’e kontra hasoru ita-nia membru Polísia hodi  tebe ita-nia membru Polísia husi oin lulik depois rasta ita-nia membru polísia ne’e liman to’o kanek no   ran,” Komandante PNTL Munisípiu Dili, Superintendente Xefe Polísia Orlando Gomes, informa ba jornalista sira  iha Eskuadra Polísia Dom Aleixo.

Membru Polísia Ajente Xefe Anacleto Piedade  halo ona keixa iha Eskuadra Polísia Dom Aleixo para kontinua halo  prosesu tanba konsidera kazu obstrusaun de autoridade .

“Tanba membru PNTL mak hanesan sai vítima nia halo keixa depois halo prosesu, suspeitu ne’e ita halo identifikasaun ita haree kona-ba kazu ne’e ita detein,” Orlando Gomes hateten.

Polísia Tránzitu nia servisu atu prevene asidente tráfiku, tanba dalaruma motorista sira kondús hela karreta no fadigadu  ba telefone, bele  hamosu asidente. Nune’e, Polísia Tránzitu ne’ebé kolokadu asegura servisu iha estrada públiku iha devér fó aviza.

Sidadaun estranjeiru na’in-rua daudaun iha ona Eskuadra Polísia Dom Aleixo submete ona ba prosesu  identifikasaun.

Jornalista: Juvinal Cabral dos Santos