Hatutan.com, (18 Jullu 2025) Díli–  Polísia Nasional Timor-Leste (PNTL) asegura abitante na’in-tolu tanba na’in-ida  husi sira na’in-tolu ne’e tenta lori kro’at sona funsionáriu Sekretariu Estadu Asuntu Toponimia no Organizasaun Urbana (SEATOU).

Abitante balun okupa espasu públiku iha área Aspol-Caicoli, Díli, sobu ona sira-nia baraka ka uma. Foto/Juvinal Cabral dos Santos

Asaun ne’e akontese, Sesta (18/07/2025), bainhira ekipa SEATOU ho funsionáriu Jestaun Merkadu Munisípiu Dili halo eviksaun  ba okupante área antigu Asrama Polísia (ASPOL, sigla Indonézia) tuir orden ka notifikasaun ne’ebé fó sai ona antes.  

Komandante Polísia Nasional Timor-Leste (PNTL) Munisipiu Dili, Superintendente Xefe Polisia Orlando Gomesinforma  ba jornalista sira iha fatin akontesimentu  hateten fundionariu SEATOU ho jestaun merkadu sira  ne’ebé hetan apoiu husi Unidade Espesiál Polísia (UEP) ho Batallaun Orden Publika (BOP) halo eviksaun ba abitante sira ne’ebé okupa espasu públiku iha área Aspol, Caicoli,  maibé sidadaun balun la satisfaz  ho eviksaun ne’e halo asaun hasoru funsionariu SEATOU ho Jestaun  Merkadu sira.

“Iha asaun ne’e tuir relatóriu katak iha na’in-ida mak tenta atu uza tudik atu sona maibé lakonsege ita-nia funsionariu ne’e ses aan tiha entaun id- ne’e ita foti hotu ba iha Eskuadra Polísia Vera-Cruz para atu halo identifikasaun ba sira,” Komandante PNTL Munisípiu Dili ne’e informa.

Iha dezetendimentu ne’e la iha vítima kanek, maibé funsionariu balun hetan tuda, tanba ne’e mak sira ba hato’o keixa iha polísia pois mak haree tuir suspeitu sira  identifikasaun ne’e hotu hafoin haree prosesu ne’e la’o oinsá.

Jornalista: Juvinal Cabral dos Santos