Hatutan.com, (05 Agostu 2025), Díli– Juventude Timor-oan, feto no mane, Tersa  (05/08/2025), hale’u tuku 07:00 dadeer Otl, forma ona iha resintu Akademia Polísia Nasionál Timor-Leste (PNTL) ho Komandu Polísia Munisípiu Dili, hodi asesu formuláriu  rekrutamentu ba kandidatu kadete PNTL períodu 2025 nian.

Lee Mós: Fulan-Agostu, Komisaun Juri Hahú Abertura Vaga 500 Ba Kadete Foun PNTL

Joven Timor-oan mane no feto hakbesik ba Akademia Polísia iha Comoro, Díli hodi foti formulariu ba vaga kandidatu kadete PNTL, Tersa (05/08/2025). Foto/Juvinal Cabral dos Santos

Maioria kandidatu kadete Polísia sira-ne’e espresa sira-nia ksolok no agradese ba Governu no Komandu Jerál PNTL tanba bele loke espasu no oportunidade ba juventude Timor-oan sira atu bele serbí nasaun no Estadu iha knaar instituisaun ne’ebé tane lema “Hametin Lei no Orden”.

“Uluk liu, ha’u orgullu ba ita nia governu bele loke rekrutamentu kadete foun PNTL tanba ida ne’e oportunidade ba ami juventude Timor-oan sira atu bele kompete iha kampu traballu. Importante ba ita mak prosesu ne’e evita familiarizmu,” Elízeu Robino dos Santos hateten ba jornalista sira iha resintu komandu PNTL Munisípiu Dili.

Elízeu husi Munisípiu Bobonaro tau esperansa boot iha komisaun rekrutamentu PNTL ne’ebé lidera husi Segundu Komandante Jerál PNTL Komisáriu Polísia Pedro Belo  atu prosesu hotu rekrutamentu ne’e la’o ho transparénsia no laiha indikasaun favoritizmu no familiarizmu.

Iha fatin hanesan Daniela Bobo Tavares da Costa husi Rejiaun Administrativu Espesiál Oe-Cusse Ambeno (RAEOA) kontente hodi espresa dehan hanesan feto ida hakarak rasik kompete hodi tuir teste  kandidatu kadete foun PNTL tanba hensan orgullu boot ba nia bainhira konsege liu iha vaga ne’e.

“Karik ha’u tuir teste ida ne’e ha’u liu, ha’u hakarak serbí povu ida ne’e. Tanba ha’u nia inan-aman uluk luta ba povu ida ne’e, luta ba rai ida ne’e ho ida ne’e mak ha’u iha inisiativa hakarak tuir hodi serbí nasaun Timor-Leste,” Daniela hateten.

Nia enkoraja feto maluk ne’ebé sai kandidatu ba kadete foun Polísia ne’e atu  labele lakon oportunidade tanba governu fó ba joven sira nune’e feto mós iha direitu kompete no luta ba nasaun ida ne’e.

Komandante Polisia Nasional Timor-Leste (PNTL) Munisipiu Dili, Superintendente Xefe Polísia Orlando Gomes hateten bazeia ba anúnsiu públiku ne’ebé fo sai iha Segunda  (04/08/2025), husi prezidente Komisaun Rekrutamentu PNTL atuál Segundo Komandante Jerál katak Tersa-ne’e iha territóriu laran tomak iha komandu munisípiu sira hotu tenke rejistu ona ba rekrutamentu ba Polísia nian.

“Komandu Polísia Munisípiu Díli hahú ohin rejistu kadete sira ne’ebé mak iha interese ba sai hanesan ajente ba Polísia,” Superintendente Xefe Polísia Orlando Gomes haktuir ba jornalista sira.

Ekipa juri husi komandu Polísia Munisípiu Díli prepara hela formuláriu sira ne’e hotu depois husi kandidatu sira ne’e mós forma depois xamada sira ba sei sukat, pasa revista ba sira nia tatoo hafoin tama iha laran rejistu naran hodi simu formuláriu rekrutamentu PNTL.

Jornalista: Juvinal Cabral dos Santos