Hatutan.com, (08 Agostu 2025), Díli- Membru Parlamentu Nasionál husi Bankada CNRT Patrocínio Fernandes, preokupa ho reabilitasaun estrada iha kapitál Díli ne’ebé laiha kontrolu ka la iha supervizaun husi Ajénsia Dezenvolvimentu Nasionál, Institutu Públiku (ADN,I.P).

Lee Mós: Estrada Bairru-Pité To’o Manleuana Sei Haluan Metru Neen Ba Foho-Lolon

Membru PN husi Bankada CNRT,  Patrocinio Fernandes.

“Ha’u hakarak haree liu kona-bá problema reabilitasaun  estrada iha fatin hotu-hotu, mais  liuliu iha kapitál Díli. Ha’u la hatene  Ajénsia Dezenvolvimentu Nasionál ne’e agora sei eziste ka lae atu halo kontrola, tanba obra estrada sira ne’e ita haree halo daudaun maibé, nia kualidade ne’e maka depois liu fulan ida-rua ne’e sobu fila-fali ke’e fila-fali,” Deputadu Patrocínio Fernandes  hateten iha nia intervensaun sesaun plenária PN, Kuarta (06/08/2025).

Deputadu ne’e fó ezemplu, hanesan reabilitasaun estrada ida iha  parte Osindu, Suku Bairru-Pité, Postu Administrativu Dom Aleixo, Díli ne’ebé  obra reabilitasaun estrada  ne’e foin finaliza fulan rua, maibé agora kee hotu fali ona.

“Tanba la hatene sistema kontrolu ne’e halo nusa, sé ida-ne’e akontese iha fatin hotu-hotu, hanesan mós estrada sira iha Díli laran, foin halo ita haree ne’ebé tau ona alkatraun. Presiza kontrola hodi haree nia kualidade, se lae, liu fulan rua-tolu sobu fila-fali,” nia hateten.

Iha fatin hanesan Vise-Ministru Asuntu Parlamentár Adérito da Costa Hugo hateten, nia parte sei envia asuntu ne’e bá parte Ajénsia Dezenvolvimentu Nasionál  atu bele kontrola obra reabilitasaun estrada sira ne’e.

Hosi sorin seluk, Diretór Ezekutivu Interinu ADN, Januário Maia Guterres hateten, loos duni katak Deputadu sira kestiona sobre projetu reabilitasaun estrada Díli laran, maibé atu dehan  de’it katak, estrada Díli laran ne’e agora iha hela faze konstrusaun hela no seidauk finaliza.

“Tanba ne’e maka faze ida kee iha estrada Osindu ne’e atu kuda ai-oan tanba iha kontratu ne’e kompañia sira tenke kuda ai-oan, ne’ebé la’ós dehan  estrada sira ne’e laiha kualidade maka kee ne’e lae,” Diretór Ezekutivu Interinu ADN Januário Maia Guterres bá Jornalista sira iha edifísiu Ministériu Finansa, Sesta (08/08/2025).

Nia esplika kualidade estrada ne’e la’ós haree husi matan, maibé tenke liuhosi teste laboratóriu maka foin hatudu nian kualidade di’ak ka lae.

“Durante ne’e ami nia ekipa konjunta laboratóriu Ministériu Obra Públiku no ADN sempre tuun hamutuk iha terrenu hodi halo uluk  teste molok nahe asphalt hanesan iha projetu reabilitasaun estrada Díli laran hanesan Bidau (eis Pasar Sengol) no seluk tán,” nia afirma.

Jornalista: Zita Menezes