Hatutan.com, (13 Agostu 2025), Ainaro– Selebrasaun loron internasionál Juventude ne’ebé monu iha loron 12 fulan-Agostu ne’e, ONG Internasionál Oxfam servisu hamutuk ho Alumni Parlamentu Foin-sa’e Timor-Leste (APFTL), Asosiasaun Jornalista Timor Lorosa’e (AJTL) no parseiru sira seluk realiza espozisaun iha fatin turizmu Rabilau ho tema “Promove Foin-sa’e Iha Setór Produtivu, Investe Agora”.

Lee Mós: Turizmu Rabilau Presiza Bee-Moos

Sekretáriu Estadu Kooperativa, Arsénio Pereira haree produtu lokal ne’ebé aprezenta iha feira Rabilau. Foto/Zita Menezes

Sekretáriu Estadu Kooperativa, Arsénio Pereira ne’ebé reprezentante IX Governu  partisipa iha espozisaun ne’e fó parabens bá joven sira ne’ebé mai kriatividade hodi  halo produtu  sira ne’ebé maka haree grupu juventude rua ne’ebé maka halo hanesan produsaun bá ai-funan, strawberry, modo no buat sira seluk ne’ebé iha sai  hanesan ponte rendimentu ekonomia bá  produtu rasik.

“Kontente tanba foins-a’e  sira maka sai futuru bá nasaun ida-ne’e, no sei kontinua futuru nasaun nian. Ha’u hakarak mai partilla ho foin-sa’e sira liuliu organiza husi parseiru sira, oinsá ita bele halo buat ruma liuhosi ita nian kriatividade. Hanesan parte Governu fahe saida maka bele kontribui no saida maka ita bele halo hamutuk hodi dezenvolve rai ida-ne’e, bá foin-sa’e sira ita boot sira maka sai ai-rin bá nasaun ida-ne’e liuliu bá ekonomia, kultura no saida de’it,” Arsénio Pereira hateten bainhira  halo abertura bá atividade espozisaun iha Rabilau, Tersa (12/08/2025).

Iha fatin hanesan reprezentante Alumni Parlamentu Foin-sa’e Timor-Leste (APFTL) Domingos Belo Mendonça de Jesus, hateten objetivu husi espozisaun ida-ne’e APFTL  hakarak atu  komunidade no juventude  agrikultór no produtór sira liga direita   ho Governu  hodi bele fó koñese juventude sira ne’ebé iha produtu.

“Ohin ita selebra loron internasionál juventude mai fó tempu atu rona ami juventude sira  nian lian hanesan kontribui bá diversifika ekonomia ne’ebé sai hanesan alternativu bá ita nian rai. Ami nu’udár joven produtór sira ne’ebé maka luta bá joven sira seluk mós ami nafatin hakarak aprosima ho Ministériu relevante sira hodi investe iha setór produtivu sira ne’e maka ami konsidera nu’udár alternativu diversifika ekonomia tanba joven barak kriativu maibé balu iha area rurál entaun ami mai halo atividade espozisaun iha Rabilau para Governu bele hatene liután produtu sira ne’ebé joven sira halo iha area rurál,” reprezentante AFPTL Domingos Belo Mendonça de Jesus informa.

Feira Rabilau, Maubisse-Ainaro. Foto/Zita Menezes

Iha fatin hanesan Xefe  grupu  Haburas Maubisse, Domingos Eustachius Lurdes hateten,  nia parte kontenti ho inisiativa atividade ida-ne’e,  produsaun Strowberry hahú kedas iha tinan 2016 bainhira sira nian grupu  hetan apoiu husi Ajénsia USA liu husi avansa agrikultura to’o mai ohin loron hodi prodús strawberry hodi supply ka fornese bá supermerkadu sira iha kapitál Díli hodi bele ajuda sira nia ekonomia.

Daniel Soares Mendonca husi grupu Ai-funan Fresku Eralesu Maubisse  kontente ho atividade espozisaun ida-ne’e tanba bele ajuda sira hodi promove liután sira nian produsaun ne’ebé maka sira grupu iha.

“Ami kontente tanba bele iha oportunidade hodi bele lori ami nian produtu faan ai-funan fresku, nune’e hodi motiva malu labele hola ai-funan masa sira ne’ebé maka fa’an iha loja, kontenti tanba bele sai mós hanesan motivasaun bá joven sira Osan sira ne’e maka ami dalaruma  uza hodi selu oan sira nian eskola no balu sustenta hodi  hola hahán no balu  uza fali hodi halo atividade kuda ai-funan sira,” Daniel Soares Mendonca hateten.

Iha atividade espozisaun ne’e reprezentante Governu sira halo diálogu mós ho komunidade no juventude sira no  hetan partisipasaun másimu husi komunidade Maubisse no hetan matak malirin husi lia Na’in sira.

Jornalista : Zita Menezes