Hatutan.com (06 Dezembru 2021), Dili—Estadus Unidus Amerika ho Timor-Leste (TL) sei realiza ezersísiu konjunta Cooperation Afloat and Readiness Training (CARAT), hosi loron 06 to’o 15 fulan-Dezembru.

Ró USS Charleston. Foto/Embaixada EUA iha TL.

Ezersísiu militár ida-ne’e sei hakle’an liu tán parseria seguransa EUA no sei hahú ho ró USS Charleston iha Timor-Leste.

Durante ezersísiu ne’e, membru FALINTIL Forsa Defeza Timor Leste (F-FDTL) hamutuk na’in 20 no membru Polísia Nasionál Timor Leste (PNTL) na’in 10 sei partisipa iha treinamentu lubuk ida iha ró laran USS Charleston.

Formasaun ne’e sei foka liu ba hametin kooperasaun no hasa’e koñesimentu kona-bá navegasaun tasi nian, enjeñaria, manutensaun ba ekipamentu tasi nian, no tratamentu médiku emerjénsia nian.

Ezersísiu ne’e sei inklui mós formasaun kona-bá direitu internasionál tasi nian, inklui esforsu sira atu kombate tráfiku umanu.

Membru Korpu Mariña EUA nian sei hamutuk ho ezersísiu CARAT hodi apoia treinamentu maneuvór no kombate urbanu ho membru F-FDTL sira iha Hera hahú husi loron 11-15 fulan Dezembru.

“EUA orgullu tebes halo parseria ho F-FDTL hodi dezenvolve TL nia kapasidade iha área seguransa marítima, asisténsia umanitária no resposta ba dezastre,” Enkaregadu Negósiu Embaixada Estadus Unidus nian Tom Daley, liu hosi komunikadu.

Ezersísiu CARAT harii iha parseria seguransa entre EUA no Timor-Leste ne’ebé buras ba bebeik, liuliu kompromisu Estadus Unidus nian ho orsamentu millaun $10 atu hamutuk ho Governu Timor-Leste reabilita aeroportu Baucau.

Liuhosi kriasaun Komponente Aéreu ida, projetu ne’e sei fó asisténsia ba F-FDTL no sei tulun Governu Timor-Leste hodi monitoriza di’ak liután nia territóriu marítimu, hodi hatán ba dezastre naturál sira no promove dezenvolvimentu ekonómiku.

Estadus Unidus mós hala’o ezersísiu militár anuál hamutuk tolu ho F-FDTL no membru servisu Timoroan barak iha Estadus Unidus ba edukasaun lian Inglés no profisionál militár nian.

Aleinde ne’e, Estadus Unidus Amérika nia Navál Seabees harii no reabilita ona klínika no eskola liu 100 iha Timor-Leste, hodi ajuda harii futuru ida ne’ebé di’ak liu ba Timoroan sira, kompleta projetu sira ho valór liu millaun $50 durante tinan 10 nia laran.

Jornalista: Rogério Cárceres