Hatutan.com, (09 Dezembru 2021), Dili—Polísia Nasionál Timor-Leste (PNTL), liuhosi Unidade Patrullamentu Fronteira (UPF), iha Kinta 09 Dezembru 2021, dadersan, halo detensaun ba joven mane na’in-tolu (3) iha fronteira terrestre, área Batugade, ne’ebé deskonfia nu’udár membru hosi Grupu Arte Marsial (GAM) balun.

Joven ne’ebé Membru UPF detein ho farda Arte Marsiál iha fronteira Batugade, Kinta (09/12/2021). Foto/PNTL.

Prosesu kapturasaun ne’e akontese, liuhosi atividade pasa revista, no halo mós apreensaun ba karreta ida hamutuk ho evidénsia komprovativu balun ne’ebé deskonfia tama hosi fronteira terrestre Timor-Leste ho Indonézia.

Notísia iha Relasaun:Deskobre fukun-sira fó espasu ba pasajen ilegál buras iha fronteira

Komandante UPF, Superintendente Euclides Belo, hateten sidadaun na’in-tolu ne’e membru UPF kaptura liuhosi pasa revista rutina iha fronteira terrestre iha dalan protokolu.

“Ohin tuku 06:00 iha kuartél UPF oin ita-nia membru kaptura timoroan mane na’in-tolu ho inisial JL, husi Suku Cassa-Ainaro ne’ebé na’in ba objetu sira hanesan farda Grupu Arte Marsiál (GAM) hosi PSHT (Persaudaraan Setia Hati Terate) hamutuk ho sertifikadu. Enkuantu na’in-rua seluk ho inisiál JS ho JA, hosi Suku Becora-Díli ne’ebé fasilita tula autór ne’e ho karreta númeru matríkula A.18.781, marka Avanza kór metan,” Komandante UPF, Superintendente Polísia, Euclides da Costa Belo, liuhosi komunikadu ne’ebé Hatutan.com asesu.

Evidénsia sira ne’ebé rekolla mak hanesan, farda treinu, kalsa no faru PSHT pares tolu, buku kesan PSHT tolu, sertifikadu treinadór neen, piagam neen, buku pedoman rua, sertifikadu juramentu hamutuk neen, ne’ebé tau iha karreta laran.

Membru UPF, hala’o pasa revista iha fronteira Batugade, Kinta (09/12/2021). Foto/PNTL.

Komandante Euclides Belo, informa, joven mane na’in-tolu ne’e, membru UPF rekolla ona sira-nia identidade no entrega ona autór hirak ne’e hamutuk ho evidénisa ba Komandu PNTL Munisípiu Bobonaro hodi kontinua prosesu identifikasaun no investigasaun.

UPF kontinua halo vizilánsia iha postu integradu Fonteira Terrestre, hodi kombate movimentu illegál.

Jornalista: Rogério Cárceres