Hatutan.com, (29 Agostu 2025), Oé-Cusse-Prezidénsia Repúblika liu husi Unidade Servisu Sosiedade Sivíl no Assuntu Sosiál, lidera husi Asesór Prinsipál Quintiliano Moniz Carvalho hamutuk ho autoridade lokál sira, Sesta (29/08/2025), inaugura  no entrega uma mahon ba inan-faluk Balbina Beno ho oan ki’ak na’in-rua iha Aldeia Bihala, Suku Bobokase, Postu Administrativu Pante Makasar, Rejiaun Administrativu Espesiál Oé-Cusse Ambeno (RAEOA).

Lee Mós: Prezidente Repúblika Konstrui Uma Dignu Ba Família Vulneravel ida iha Atsabe

Prezidente Repúblika, José Ramos-Horta oferese uma mahon ida ba inan faluk ho oan ki’ak sira iha Aldeia Bihala, Suku Bobokase, Postu Administrativu Pante Makasar, RAEOA, Sesta (2908/2025). Foto/Juvinal Cabral dos Santos

Benefisiária uma-mahon, Balbina Beno ho matawen hato’o nia agradese ba  Prezidente Repúblika, José Ramos-Horta  liuhosi Asesór Prinsipál Quintiliano Moniz Carvalho, hamutuk ho autoridade lokál sira ne’ebé oferese ona uma mahon ida nia ho nia oan sira.

 “Ha’u kontenti tanba boot sira oferese uma ne’e mai ha’u, kontenti tebes boot sira fó uma ne’e, ha’u simu ho liman-rua,” Balbina Beno ba jornalista sira iha ámbitu entrega uma mahon husi Prezidénsia Repúblika ne’e.

Xefe Suku Bobokase, Thomas Nessi, hateten hanesan autoridade lokál agradese ba Prezidente Repúblika  no nonu  governu ne’ebé apoiu uma mahon ida ne’e hanesan siáal ida ba povu nia konfiansa tomak.

“Ha’u agradese tanba uma mahon ida ne’e foin ba dahuluk abitante  Suku Bobokase nian hetan no  ami la haluha agradese ba  Prezidente Repúblika liu husi ami nia pedidu ita-boot sira bele aprova maske durasaun lao kleur, maibé rezultadu ikus realiza duni,”  Thomas Nessi hateten.

Asesór Prinsipól Prezidénsia Repúblika  Quintiliano Moniz Carvalho, rekomenda ba benefisiaria inan faluk Balbina ho oan ki’ak sira atu kuidadu uma ne’e ho di’ak.

“Kuidadu uma ne’e halo di’ak, ne’e ita-boot sira nian, kona-ba rai mós la iha problema, xefe suku hateten ona rezolvidu, família rezolve mak hodi entrega rai ne’e ba ama. Ha’u rekomenda ba familia sira kontinua kuidadu kioske kuandu mai oin, ha’u sempre hateten ba sira inan-aman ne’ebé hetan apoiu husi prezidensia ba iha uma ne’e liu-liu mak kioske, ita kada fulan tolu halo kontrolu,”  Quintiliano Moniz Carvalho hateten.

Tuir informasaun relata husi inan faluk Balbina katak, nia kaben mate tiha ona iha tinan 2001. Hafoin husi moris ne’ebé moruk ne’e, inan faluk ho oan kiak sira ne’e seidauk hetan esperansa foun ruma to’o agora.

Tanba ne’e autoridade lokál husi Aldeia ne’e ho initsiativa halo Pedidu direta ba Prezidente Repúblika J. Ramos-Horta. Tuir despaixu husi Prezidente Repúblika no fó orientasaun ba Assesor SSAS hodi hamutuk ho Autoridade lokal atu inisia konstrusaun.

Kondisaun uma inan faluk, Balbina Beno ho nia oan sira. Foto/Juvinal Cabral dos Santos

Konstrusaun uma foun ne’e, ho medida 8×7 metru, hala’o durante fulan-tolu, hahú iha loron 13 fulan-Maiu  to’o remata iha loron 8 fulan-Agostu 2025. Estrutura uma ne’e kompostu husi kuartu rua, sala vizita, sala ba han nian, dapur no haris fatin inklui loke mós kioske ida ba sira atu bele sustenta sira nia ekonomia familia nian.

Konstrusaun ne’e konstrui direta husi Ekipa Servisu Sosiedade Sivíl no Assuntu Sosiál Prezidénsia Repúblika nian.

Seremónia entrega uma foun ne’e simboliza la’ós deit oferta abitasaun dignu, maibé mós hanesan sinál solidariedade no esperansa ba família vulnerável sira iha Timor-Leste.

Iha serimonia ne’e ekipa fahe mós nesesidade bazika ba  komunidade vulneravel, ema ho defisiénsia hamutuk uma-kain 50 iha Suku Bobokase hanesan  foos, mina, manu-tolun, manta, roupa, sapatu no inklui mós ekipamentu  bola, farda futeból nian ba joven sira.

Jornalista: Juvinal Cabral dos Santos