Hatutan.com, (02 Setembru 2025), Díli– Sekretáriu Estadu Komunikasaun Sosiál (SEKOMS), Expedito Dias Ximenes solisita ona naran média no jornalista na’in-10  ba Ministériu Negosiru Estranjeiru no Kooperasaun (MNEK) atu halo kobertura direta iha serimonia adezaun ofisiál Timor-Leste nian ba membru plenu ASEAN nian.

Lee Mós: SEKOMS Hakarak Restrinje Liberdade Imprensa iha Timor-Leste

Jornalista Hatutan.com halo konfirmasuan direta ho SEKOMS Expedito Dias Ximenes. Foto/Zita Menezes

Tuir ajenda katak Estadu sira membru ASEAN nian sei simu ofisiál adezaun Timor-Leste nian hanesna membru plenu ASEAN iha  Malázia iha loron 26 fulan-Outubru 2025.

SEKOMS Expedito Dias Ximenes, informa kuota ne’ebé Ministériu Negosiu Estranjeiru Kooperasaun (MNEK) fó bá jornalista  na’in-10, de’it maka atu bá halo kobertura bá serimónia ofisiál Timor-Leste sai membru  ASEAN.

Ho nune’e SEKOMS indika ona média sira ne’ebé atu halo kobertura iha eventu istóriku ida-ne’e mak hanesan Jornalista na’in-rua  husi Rádiu Teelizaun Timor-Leste, Empreza Públika (RTTL,E.P), jornalista na’uin-rua husi Ajensia Notisioza Timor-Leste  (TATOLI,I.P),  jornalista na’in-ida husi  GMNTV, jornalista na’in-ida husi jornal Diáriu Timor Post,  jornalista na’in-ida husi Jornál Diáriu Suara Timor Lorosa’e,  jornalista na’in-rua husi SMN-News ho jornalista na’in-ida husi mídia One Timor.

“Tanbasá maka haree sira ne’e, primeiru sira ne’e antigu liu, segundu tanba sira nian viewers ne’e barak, terseiru tanba sira nian atividade ne’e ema akompañia barak, ne’e la signifika imi  hanesan Hatutan.com ho Jornál Diáriu INDEPENDENTE lae, imi bele hetan out-put maibé ne’e sei proposta hela seidauk fixu,” Expedito Dias Ximenes bá jornalista iha resintu Palasiu Prezidensiál, Bairu-Pite, Segunda (02/09/2025).

SEKOMS hateten, “ha’u maka husu bá MNEK fó  kuote bá  jornalista na’in-10, ha’u maka propoin bá, laiha diskriminisaun, sé sira husu dehan bá hotu ne’e bele bá hotu, mais dehan na’in-10 de’it ne’e ha’u atu hili  oinsá looos ka lae,” Expedito Dias Ximenes tenik.

SEKOMS esplika problema ne’e jornalista sira bá ne’e selu husi MNEK no kuota ne’e mai husi MNEK husu na’in-10 maka SEKOMS  hanesan halo avaliasaun  kriteria hodi hili mídia sira ne’ebé maka sita ona.

“Loron seluk imi  sira la bala ne’e sei bá fali, la hateten diskriminasaun, Hatutan.com ho jornál Indepedente iha ha’u nian fuan, ne’ebé sei la husik, maibé imi hein uituan sei iha tán fali atividade bá ne’e imi nia naran sei bá. Ha’u servisu tiha ho imi, nusá ha’u bá diskrimina fali imi, soké kuantidade fó ne’e maka hanesan ne’e de’it,” Expedito Dias Ximenes fó rajaun.

Mídia ne’ebé la tama iha lista ba ba halo kobertura ba adezaun Timor-Leste nian ba ASEAN ne’e hanesan Jornál Diáriu INDEPENDENTE, Hatutan.com, Lafaek News, Sap-News, Loluwari, TVE Timor, VIP,  Dili- ost no G-News.

Iha fatin hanesan Vise Ministra asuntu ASEAN, Milena Rangel hateten, kona-bá asuntu kobertura média nian bá serimonia referé iha  hela komunikasaun ho parte uma na’in para bele haree pelemenus média hira maka atu bá partisipa.

Vise-Ministra Asuntu ASEAN, Milena Rangel hateten  katak husi SEKOMS prepara ona mekanizmu balu, la’ós tenke ser bá partisipa iha ne’ebá, mais ho kobertura iha ne’ebá bele mós partilla mós mai iha Díli iha Timor laran tomak povu hotu-hotu bele akompañia.

“Sobre sé-sé maka atu bá, iha hela komunikasaun ho SEKOMS no uma na’in  (Malázia) para haree ita nian média nian partisipasaun ne’e halo nusá. Ita-boot sira hatene eventu internasionál ema barak tebe-tebes , ita mós foin maka atu tama hanesan membru iha protokolu barak ita tenta atu haree hotu husi parte hotu,” Vise-Ministra ASEAN Milena Rangel informa.

Nia hatutan, média ne’ebé maka atu bá partisipa halo kobertura ne’e  MNEK  sempre servisu hamutuk ho SEKOMS para haree, ne’ebé la’ós MNEK maka atu deside de’it, mais hamutuk kolaborasaun. Ate agora sei iha hela koordenasaun ho SEKOMS, sei hela tán fulan rua, sedu demais atu foti desizaun bá ida-ne’e.

Jornalista: Zita Menezes