Hatutan.com, (12 Setembru 2025), Díli-Portavós Komisaun Rekrutamentu Ajente  Polísia Nasional Timor-Leste (PNTL) 2025, Superintendente António da Luz,  informa prova kulturál ba kandidatu  PNTL sira sei hala’o iha loron 05  fulan-Outubru 2025 iha munisípiu 13, inklui iha Sentru Formasaun Polísia (CFP, sigla portugés), Comoro, Dili.

Lee Mós: Komisaun Rekrutamentu PNTL Simu Dokumentu Kandidatu Sira 4.428

Sira ne’ebé konsidera provadu tenke ultrapasa valor 60 no hirak ne’ebé hetan deit valor 59 mai karaik sei reprovadu ka la pasa atu hakat ba prova tuir mai (elimina).

Portavós Komisaun Rekrutamentu Ajente Polísia Nasional Timor-Leste (PNTL) 2025, Superintendente António da Luz. Foto/Juvinal Cabral dos Santos

“Atu tuir ezame sira mai tenke lori dokumentu legal hanesan kartaun eleitoral, bileti identidade  tanba númeru ne’ebé mak sekretariadu fó sai ne’e prepara ba ezame nian, antes ne’e sei taka sai por ezemplu nia númeru hira AL (Aileu 001) númeru ida ne’e mak sei tau iha lista prezensa ne’e sira tama sei verifika no konfirma  ida-idak asina mak tama tur iha laran foin hahú fó sai kona-bá regulamentu ezame nian,” Portavós Komisaun Rekrutamentu PNTL 2025, Superintendente António da Luz hateten ba jornalista sira  iha Centro Formasaun Polísia (CFP), Comoro, Sesta (12/09/2025).

Formatu ba ezame kultural ne’e prepara husi Ministériu Edukasaun nune’e sekretariadu fiar katak kandidatu barak kompriende ona tanba iha eskola Pre-sekundaria no Sekundaria sira mós tuir ezame nasionál bele dehan sira iha koñesimentu di’ak ona, maibé antes tama ezame mós ekipa fiskalizadór sira sei esplika klaru liutan.

Superintendente António da Luz husu ba kandidatu sira tuir  ezame preinxe ho didi’ak no kuidadu, labele halo fo’er se lae mákina la simu tanba ne’e la’ós koresaun manual.

Iha Sesta, 12 fulan-Setembru ne’e, halo formasaun ba pontu fokal sira husi munisípiu, liu-liu preparasaun ba ezame kandidatu sira nian atu oinsá pontu fokal sira bele preinxe formulariu resposta nian. Tanba ne’e uja sistema edukasaun nian ne’ebé presiza pontu fokal ida-idak tenke hatene tanba sira ba sei halo fali formasaun ba ekipa fiskalizador sira.

Superintendente António da Luz, informa mós katak iha Kinta (11/09/2025), pontu fokal munisipiu sira submete ona dokumentu sira kandidatu nian mai iha Sekretariadu Nasionál ho total kandidatu ida ne’ebé submete dokumentu ne’e na’in-13.772,  total ne’e mai husi kandidatu sira ne’ebé  mak foti fomulariu na’in-17.294 husi munisípiu 13  inklui Sentru Formasaun Polísia.

“Agora husi 13.772 ne’e ekipa sekretariadu sei halo selesaun fila fali, haree dokumentu sira ne’e  kompletu sira passa mak balun la kompletu tuir rekezitu ne’ebé iha sei elemina, tanba ne’e mak servisu boot sekretariadu nian halo verifikasaun fila-fali, verifikasaun ne’e han tempu semana ida tanba barak presiza atensaun didi’ak atu nune’e labele prezudika prosesu sira ne’e,” nia hateten.

Portavós Rekrutamentu Ajente PNTL haktuir, ohin verifikasaun hahu la’o tempu ne’e semana ida depois taka sai lista ne’e ba públiku sei fó tempu loron lima ba kandidatu sira atu bele haree sira nia lista naran, se mak sai prepara ba ezame data ezame mak iha loron 05 fulan-Outubru 2025 espera katak prosesu hotu la’o di’ak.

“Prova kultural ne’e ita halo iha munisípiu ida-idak depois sira pasa iha prova kultural hotu-hotu sei konsentra fali iha Díli Sentru Formasaun Polísia (CFP), tanba ezame fiziku so iha de’it CFP tanba fasilidade sira ita prepara iha CFP ba sira ne’ebé mak passa “.

Jornalista: Juvinal Cabral dos Santos