Hatutan.com, (29 Outubru 2025),Díli—Timor-Leste marka instória foun sai membru ASEAN bá dala-11, maibé povu  kontínua dezafia Primeiru-Ministru Kay Rala Xanana Gusmão ho Prezidente Repúblika, José Ramos-Horta atu luta lori kadoras   Greater Sunrice mai Timor-Leste.

Lee Mós: Timor-Leste Marká Tán Istória Ida Tama ASEAN, Ramos-Horta Husu Hametin Dame, Servisu Maka’as ho Onestidade

Lian-na’in Kartetu-Motael, Pio Ataide. Foto/Marcelino Tomae

Lia-na’in Karketu-Motael, Pio Ataide,  hateten povu kontente tanba luta naruk hahú kedas iha tinan 2011 atu sai membru plenu ASEAN ne’e konsege konkretiza iha Simeira ASEAN ba dala-47 iha Kuala Lumpur, Malázia iha loron 26 fulan-Outubru 2025.

“Ita nia sentimentu ne’e labele sura ho númeru, ne’e liu tiha ita-nia povu Timor nia hakarak tanba nasaun 10 ona apoiu  ita tama bá ASEAN, ne’ebé ita laiha  liafuan atu ko’alia bá ASEAN,  agora  ita-nia hakarak, Avó Nana  (Xanana-red) ho Avó Horta ténke esfosu dada kadoras Greater Sunrice mai Timor-Leste,” Pio Ataide hateten bá jornalista iha Palásiu Prezidensiál, Dili, iha ámbitu simu Prezidente Repúblika José Ramos-Horta fila hosi Malázia, Kuarta (29/10/2025).

Luta bá kadoras Greater Sunrice mai Timor-Leste,  nia mós husu entidades hotu-hotu atu kontribui ideia hodi hadia setór importánsia sira maka hanesan, edukasaun, saúde no agrikultura no infrastrutura.

Lia-na’in Karketu ne’e lójia ho  lideransa Primeiru-Ministru Kay Rala Xanana Gusmão no Prezidente Repúblika, José Ramos-Horta,  konsege lori mehi Timor-Leste  sai realidade nu’udár membru penu ASEAN ba dala-11.

“Ita reza nafatin bá Aman, bá Maromak, tanba Timor-Leste bele hatan  ketuas  na’in rua Xanana ho Ramos-Horta  atu nune’e luta tán bá ita-nia mina Greater Sunrice dada mai Timor-Leste,” nia hateten.

Iha fatin hanesan  Domigos Monteiro “Loran”, nu’udár abitante ida iha Dili espresa nia kontente ho  Governu ne’ebé  lidera hosi Primeiru-Ministru Kay Rala Xanana Gusmão ho Prezidente Repúblika José Ramos-Horta,  ne’ebé hatuur ona banderia Timor-Leste  iha ASEAN.

“Avó  Ramos ho Avó Nana (Xanana-red) lori buat furak mai Timoroan nia futuru, tanba  ita tama bá ASEAN la fasil,” Domingos  “Loran”  hateten.

Nia afirma, jerasaun foun ténke aprende hosi líder na’in rua; Xanana ho Ramos-Horta,  hodi kontinua RTDL nia  destinu bá futuru ida prosperu no dezenvolvidu.

Nia rekomedasaun bá  Governu, atu hadia setór infrastura báziku sira iha teritóriu laran tomak, tanba povu sei hamrok hela no povu sei susar nafatin iha ukun an ida-ne’e

“Nai ulun sira koko took la’o iha munisípiu  inklui ita-boot  jornalista sira la’o bá took  hodi haree saída moruk  iha kotuk no midar ne’ebé povu sira iha area remota enfrenta iha sira-nia moris,” nia hateten.

Jornalista: Marcelino Tomae