Hatutan.com, (30 Outubru 2025), Díli– Ajente Polísia Benjamin dos Santos husi Unidade Patrollamentu Fronteira (UPF) Postu Nunura, Suku Leolima, Munisípiu Bobonaro, tiru aan rasik deskonfia iha presaun.

Tenente Jenerál Falur Rate Laek ho Komisáriu Jerál Polísia Henrique da Costa hato’o sentidu triste kle’an ba matebian Banjamin membru UPF ne’ebé tiru an. Foto/Juvinal dos Santos

“Kuarta,  29 fulan-Outubru tinan 2025, ha’u rona relatóriu husi Komadante UPF katak membru ida iha Bobonaro nian ne’ebé mak tiru aan,” Komandante Jerál Polísia Nasionál Timor-Leste (PNTL) Komisariu Jerál Polísia, Henrique da Costa informa ba jornalista sira iha serimónia enseramentu Operasaun Ouro Forsa Tarefa Konjunta F-FDTL-PNTL iha Keartél Unidade Espesiál Polísia (UEP), Bairru-Pité, Kinta (30/10/2025).  

Rona tiha informasaun ne’e, Komandante Jerál PNTL Komisáriu Jerál Polísia Henrique da Costa, orienta kedas  investigasaun parte Forensik nian ba kedas iha fatin akontesimentu ne’ebé dalaruma ligadu kona-bá servisu  kolokasaun no sente presaun ne’ebé maka’ás bele foti desizaun hanesan ne’e.

Komisáriu Jerál Polísia Henrique da Costa rekoñese katak  tanba nia iha servisu presaun mak ema ida de’it nia servisu oras 24 nia laran, nia kontrola distansia ne’ebé mak dook ida ne’e mós bele sai poténsia,  maibé antes ne’e membru refere ho kondisaun monetal normal hela.

Iha fatin hanesan Xefe Estadu Maiór Jeneral F-FDTL,  Tenente Jenerál Domingos Raúl “Falur Rate Laek” mós diriji minute ida hakmatek ba membru Ajente Polísia Benjamin dos Santos ne’ebé tiru an iha hariis fatin nia laran  iha  Postu UPF Ponte Nunura.

“Ita hakruuk minute ida hakmatek ba ita nia eroi martir sira hotu-hotu ne’ebé husik hela rai ida ne’e  ba ita, husik hela nasaun no instituisaun ne’e ba ita PNTL ho F-FDTL ba ita sira-nia klamar hamutuk ho ita no espesiál liu-liu ba ita nia kompañeru arma alin ida, irmaun, no kamarada ida horseik oho an iha Nunura, nia rasik mak tiru nia an mais ita hakruk ba nia, fó omenazen ba nia nu’udar ema ne’ebé serbí ona instituisaun PNTL, instituisaun estadu nian hanesan mos serbí ona halo misaun barak  ba rai ida ne’e,” Falur Rate Laek hateten.

Falur dezeza servisu di’ak hadi’a disiplina vida profisionál no vida familiar hato’o espiritu solidaridade ba kamarada alin ida tiru aan.

“Ita komenta triste, ita nia alin sira oho an, sira sente katak sira mesak hela iha izoladu la iha maluk ida ba apoiu sira, ita bele dehan katak sira ne’e depresaun mentál ka dalaruma problema sira la fó solusaun to’o oho an,” Falur hateten.

Jornalista: Juvinal Cabral dos Santos